தொழில் துறை உற்பத்தி ஆகஸ்டில் மைனஸ் 0.10%

புதுடில்லி:நாட்டின் தொழில் துறை உற்பத்தி வளர்ச்சி, கடந்த ஆகஸ்ட் மாதத்தில் மைனஸ் 0.10 சதவீதமாக சரிந்துள்ளதாக, தேசிய புள்ளியியல் அலுவலகம் தெரிவித்துள்ளது. சுரங்கம் மற்றும் மின்சார உற்பத்தி துறைகளின் சுமாரான செயல்பாடுகளே, வளர்ச்சி குறைய முக்கிய காரணமாக அமைந்தது. தொழில் துறை உற்பத்தி வளர்ச்சி கடந்த ஜூலையில் 4.70 சதவீதமாகவும்; கடந்தாண்டு ஆகஸ்டில் 10.90 சதவீதமாகவும் இருந்தது. கடந்த ஆகஸ்டில் கனழை காரணமாக, சுரங்கத்துறை உற்பத்தி வளர்ச்சி மைனஸ் 4.30 சதவீதமாகக் குறைந்ததாக தெரிவிக்கப்பட்டுள்ளது. மின்சாரத் துறையின் வளர்ச்சி மைனஸ் 3.70 சதவீதமாகவும்; தயாரிப்பு துறை உற்பத்தி வளர்ச்சி 1 சதவீதமாகவும் இருந்தன. இதற்கிடையே, நடப்பாண்டு ஏப்ரல் முதல் ஆகஸ்ட் வரையிலான காலத்தில், தொழில் துறை உற்பத்தி வளர்ச்சி 4.20 சதவீதமாக சரிந்துள்ளது. இது, கடந்தாண்டின் இதே காலத்தில் 6.20 சதவீதமாக இருந்தது.