மேற்குவங்கத்தில் 5 மாடி கட்டடம் இடிந்து விபத்து: 2 பேர் பலி; 13 பேர் மீட்பு

கோல்கட்டா: மேற்குவங்க மாநிலம் தெற்கு கோல்கட்டாவில் 5 மாடி கட்டடம் இடிந்து விபத்துக்குள்ளானது. இந்த விபத்தில் 2 பேர் உயிரிழந்தனர். 7 பேர் படுகாயம் அடைந்தனர். 13 பேர் பத்திரமாக மீட்கப்பட்டுள்ளனர். சம்பவ இடத்திற்கு, நெற்றியில் காயம் அடைந்து சிகிச்சை பெற்று வந்த அம்மாநில முதல்வர் மம்தா பானர்ஜி விரைந்தார். மேற்குவங்க மாநிலம் தெற்கு கோல்கட்டாவில் 5 மாடி கட்டடம் ஒன்று கட்டப்பட்டு வந்தது. கட்டுமானப் பணியில் தொழிலாளர்கள் ஈடுபட்டு வந்த போது, கட்டடங்கள் இடிந்து விபத்துக்குள்ளானது. இந்த விபத்தில் 2 பேர் உயிரிழந்தனர். சம்பவ இடத்திற்கு விரைந்த தீயணைப்பு படையினர் கட்டுமான இடிபாடுகளில் சிக்கிய 13 பேரை பத்திரமாக மீட்டனர். மேலும் 7 பேர் படுகாயம் அடைந்து, சிகிச்சைக்காக மருத்துவமனையில் அனுமதிக்கப்பட்டுள்ளனர். இடிபாடுகளில் சிக்கியவர்களை மீட்கும் பணி நடைபெறுகிறது. உயிரிழந்தோரின் குடும்பத்திற்கு தலா ரூ.5 லட்சம் நிவாரணம் அறிவிக்கப்பட்டுள்ளது. நெற்றியில் காயம் அடைந்து சிகிச்சை பெற்று வந்த மேற்குவங்க முதல்வர் மம்தா பானர்ஜி சம்பவ இடத்திற்கு விரைந்தார். உடனுக்குடன் நடவடிக்கை எடுக்க வேண்டும் என அதிகாரிகளுக்கு மம்தா பானர்ஜி உத்தரவிட்டுள்ளார்.

மம்தா பேட்டி

நிருபர்கள் சந்திப்பில் மம்தா கூறியதாவது: இடிபாடுகளில் 6 பேர் சிக்கி உள்ளனர். அவர்கள் விரைவில் மீட்கப்படுவார்கள். விபத்து குறித்து விசாரணை நடத்த உத்தரவு பிறப்பிக்கப்பட்டுள்ளது. இறந்தவர்கள் மற்றும் காயமடைந்தவர்களின் குடும்பங்களுக்கு மாநில அரசு உதவி செய்யும். அருகில் உள்ளவர்களின் வீடுகளும் சேதமடைந்துள்ளன. அவர்களுக்கும் அரசு உதவும். இவ்வாறு அவர் கூறினார்.