படுதோல்விக்கு கூட்டணி தான் காரணம்; லாலு கட்சி மீது பழி போடும் பீஹார் காங்கிரஸ்

பாட்னா: பீஹார் தேர்தல் தோல்விக்கு லாலு கட்சியுடன் கூட்டணி வைத்தது தான் காரணம் என்று காங்கிரஸ் கட்சியினர் புகார் எழுப்பியுள்ளனர். இதனால் கூட்டணியில் மோதல் ஏற்பட்டுள்ளது.பீஹார் மாநிலத்தில் நடந்த சட்டசபை தேர்தலில், ஆர்ஜேடி -காங்கிரஸ் கூட்டணி படுதோல்வி அடைந்தது. முந்தைய சட்டசபையில் இருந்த இடங்களை கூட காப்பாற்ற முடியாமல் அந்த கூட்டணியில் இருந்த அனைத்து கட்சிகளும் தோல்வி அடைந்துள்ளன.பாஜ மற்றும் நிதிஷ் கூட்டணி மொத்தமுள்ள 243 இடங்களில் 200 இடங்களை வென்று அசுர பலத்துடன் ஆட்சி அமைத்துள்ளது. காங்கிரஸ் கட்சி சார்பில் போட்டியிட்ட 61 பேரில், 6 பேர் மட்டுமே வென்றுள்ளனர். இந்நிலையில் தோல்வியை ஆராய காங்கிரஸ் தலைமை கூட்டம் நடத்தியது.இதில் கலந்து கொண்ட, காங்கிரஸ் தலைவர்களில் ஒருவரும், முந்தைய சட்டசபை காங்கிரஸ் தலைவருமான ஷக்கீல் அஹமது கான், ''லாலு கட்சியுடன் கூட்டணி இல்லாமல் இருந்தால் கூட வெற்றி பெற்றிருப்போம். இப்படி படுதோல்வி அடைந்ததற்கு காரணம், கூட்டணியாக போட்டியிட்டது தான். இந்த கருத்தை தான் போட்டியிட்ட வேட்பாளர்களில் பெரும்பகுதியினர் தெரிவித்துள்ளனர்,'' என்றார்.