காங்கிரசின் சோனியா, ராகுலுக்கு அடுத்த... சிக்கல்! நேஷனல் ஹெரால்டு வழக்கில் புது எப்.ஐ.ஆர்., பதிவு

புதுடில்லி: 'நேஷனல் ஹெரால்டு' தொடர்புடைய பண மோசடி வழக்கில், காங்., முன்னாள் தலைவர்களான சோனியா, அவரது மகன் ராகுல் உட்பட ஆறு பேர் மீது, டில்லி பொருளாதார குற்றப்பிரிவு போலீசார், எப்.ஐ.ஆர்., எனப்படும் முதல் தகவல் அறிக்கையை பதிவு செய்துள்ளனர். 'நேஷனல் ஹெரால்டு' என்ற பத்திரிகையை, ஏ.ஜே.எல்., எனப்படும், 'அசோசியேட்டட் ஜர்னல்ஸ் லிமிடெட்' நிறுவனம் நடத்தி வந்தது. நிதி நெருக்கடியில் சிக்கிய இந்த நிறுவனத்தை, 50 லட்சம் ரூபாய்க்கு, 'யங் இந்தியன்' என்ற நிறுவனம் வாங்கியது. குற்றப்பத்திரிகை இந்நிறுவனத்தில் காங்., முன்னாள் தலைவர் சோனியா, அவரது மகனும், லோக்சபா எதிர்க்கட்சித் தலைவருமான ராகுல் முக்கிய பங்குதாரர்களாக உள்ளனர். மேலும், காங்., மூத்த தலைவர்கள் பலரும் இந்நிறுவனத்தில் இயக்குநர்களாக உள்ளனர். ஏ.ஜே.எல்., நிறுவனத்தின், 2,000 கோடி ரூபாய் மதிப்புள்ள சொத்துகளை பறிக்கும் வகையில், இந்த பரிவர்த்தனை நடந்ததாக, பா.ஜ., மூத்த தலைவர் சுப்பிரமணிய சுவாமி, 2014ல் வழக்கு தொடர்ந்தார். இதில் நடந்த சட்டவிரோதப் பணப் பரிமாற்றம் குறித்து, அமலாக்கத் துறை தனியாக வழக்குப் பதிந்து விசாரித்து வருகிறது. இந்த விவகாரத்தில், 751 கோடி ரூபாய் மதிப்புள்ள சொத்துகள் முடக்கப்பட்டு உள்ளன. சமீபத்தில், இந்த வழக்கில் சோனியா, ராகுல் உள்ளிட்டோர் மீது சிறப்பு நீதிமன்றத்தில் அமலாக்கத் துறை தரப்பில் குற்றப்பத்திரிகை தாக்கல் செய்யப்பட்டது. இதனடிப்படையில், வரும் 16ல், டில்லி சிறப்பு நீதிமன்றம் முக்கிய உத்தரவை பிறப்பிக்க உள்ளது. இந்நிலையில், இந்த வழக்கில் விசாரணை நடத்திய அமலாக்கத் துறை அதிகாரிகள் அளித்த புகாரின்படி, சோனியா, ராகுல், மூத்த தலைவர்கள் சாம் பிட்ரோடா, சுமன் துபே உட்பட ஆறு பேர் மீது, டில்லி காவல் துறையின் பொருளாதார குற்றப்பிரிவு, புதிதாக, முதல் தகவல் அறிக்கையை பதிவு செய்துள்ளது. மோசடி இதுதவிர, 'ஏ.ஜே.எல்., யங் இந்தியன், டோடெக்ஸ் மெர்சண்டைஸ் பிரைவேட் லிமிடெட்' ஆகிய மூன்று நிறுவனங்களின் பெயர்களும் முதல் தகவல் அறிக்கையில் இடம்பெற்றுஉள்ளன. குற்ற சதி, சொத்துகளை மோசடியாக அபகரித்தல், நம்பிக்கை மோசடி மற்றும் ஏமாற்றுதல் உள்ளிட்ட பிரிவுகளின் கீழ் இந்த வழக்கு பதிவு செய்யப்பட்டு உள்ளது. நாடகமாடுகின்றனர்! நீதிமன்ற உத்தரவுப்படியே, நேஷனல் ஹெரால்டு முறைகேடு தொடர்பாக வழக்குப் பதிவு செய்யப்பட்டது. இதில், பா.ஜ.,வுக்கு எந்த சம்பந்தமும் இல்லை. இந்த வழக்கில் சோனியா, ராகுலுக்கு நீதிமன்றம் எந்த நிவாரணத்தையும் அளிக்கவில்லை. ஊழலை செய்து விட்டு பாதிக்கப்பட்டவர்கள் போல அவர்கள் இருவரும் நாடகமாடுகின்றனர். ஷெசாத் பூனாவாலா செய்தித் தொடர்பாளர், பா.ஜ.,பழிவாங்கும் அரசியல்! பிரதமர் நரேந்திர மோடி, மத்திய உள்துறை அமைச்சர் அமித் ஷா ஆகியோர், காங்., மேலிடத் தலைவர்களுக்கு எதிராக பழிவாங்கும் அரசியலில் ஈடுபட்டு வருகின்றனர். அதன் வெளிப்பாடே, சோனியா, ராகுல் மீது பதியப்பட்டுள்ள புது வழக்கு. நேஷனல் ஹெரால்டு வழக்கு முற்றிலும் ஜோடிக்கப்பட்ட வழக்கு. பா.ஜ.,வினர் என்ன செய்தாலும் இறுதியில் நீதியே வெல்லும். இதற்கெல்லாம் நாங்கள் பயப்பட மாட்டோம். ஜெய்ராம் ரமேஷ் பொதுச்செயலர், காங்.,