எஸ்ஐஆர் படிவங்களை சமர்ப்பிக்க டிசம்பர் 11ம் தேதி வரை அவகாசம்: தேர்தல் கமிஷன் அறிவிப்பு

சென்னை: எஸ்ஐஆர் கணக்கீட்டு படிவங்களை சமர்ப்பிக்க டிசம்பர் 11ம் தேதி வரை கால அவகாசத்தை நீட்டித்து, தேர்தல் கமிஷன் தெரிவித்து உள்ளது.பீஹார் சட்டசபை தேர்தலை முன்னிட்டு வாக்காளர் சிறப்பு தீவிர திருத்த பணிகள் (எஸ்.ஐ.ஆர்.) நடப்பாண்டில் நடைபெற்றது. இதேபோன்று, நாடு முழுவதும் எஸ்ஐஆர் எனப்படும் வாக்காளர் சிறப்பு தீவிர திருத்த பணிகள் மேற்கொள்ளப்படும் என தேர்தல் கமிஷன் அறிவித்தது. அதன்படி, தற்போது தமிழகம் உட்பட 12 மாநிலங்களில் வாக்காளர் பட்டியல் சிறப்பு தீவிர திருத்தப்பணிகள் நடைபெற்று வருகின்றன. இந்த பணிகளை செய்து முடிக்க காலஅவகாசம் வழங்க வேண்டும் என தமிழக அரசு கோரிக்கை விடுத்து இருந்தது. தற்போது எஸ்ஐஆர் கணக்கீட்டு படிவங்களை சமர்ப்பிக்க டிசம்பர் 11ம் தேதி வரை கால அவகாசத்தை நீட்டித்து உள்ளது. டிசம்பர் 4ம் தேதியுடன் அவகாசம் முடிவடையும் நிலையில் டிசம்பர் 11ம் தேதி வரை நீட்டிக்கப்பட்டு உள்ளது. வரைவு வாக்காளர் பட்டியல் டிசம்பர் 16ம் தேதி வெளியிடப்படும். வரைவு வாக்காளர் பட்டியலில் ஆட்சேபனை இருந்தால் ஜனவரி 15ம் தேதிக்குள் தெரிவிக்கலாம். ஆட்சேபனைகள் குறித்து பிப்ரவரி 7ம் தேதிக்குள் அதிகாரிகள் முடிவு எடுக்க வேண்டும். பிப்ரவரி 14ம் தேதி இறுதி வாக்காளர் பட்டியல் வெளியிடப்படும் என தேர்தல் கமிஷன் தெரிவித்துள்ளது.