ராபிடோ பைக் டாக்சி டிரைவர் வங்கி கணக்கில் ரூ.331 கோடி அவருக்கே தெரியாமல் பயன்படுத்தி மோசடி

புதுடில்லி: 'ஆன்லைன்' சூதாட்ட செயலி தொடர்புடைய பண மோசடி வழக்கில், 'பைக் டாக்சி' நிறுவனமான, 'ராபிடோ' டிரைவரின் வங்கிக் கணக்கில், 331 கோடி ரூபாய் மதிப்புள்ள பரிவர்த்தனைகள் நடந்துள்ளதை, ஈ.டி., எனப்படும் அமலாக்கத் துறை கண்டுபிடித்துள்ளது. 'ஒன் எக்ஸ் பெட்' என்ற ஆன்லைன் சூதாட்ட செயலி மூலம், நாடு முழுதும் ஆயிரக்கணக்கானோர் ஏமாற்றப்பட்டு உள்ளனர். மோசடியாக பெறப்பட்ட பல கோடி ரூபாய், சட்ட விரோத பணப் பரிமாற்றத்துக்கு பயன்படுத்தப்பட்டு உள்ளது. இது குறித்து வழக்குப் பதிந்த அமலாக்கத் துறை, இந்த செயலியின் விளம்பரத்தில் நடித்த கிரிக்கெட் வீரர்கள் ஷிகர் தவான், சுரேஷ் ரெய்னா, ராபின் உத்தப்பா போன்ற பிரபலங்களிடம் விசாரணை நடத்தினர். இந்நிலையில், 'ஒன் எக்ஸ் பெட்' செயலி தொடர்புடைய பண மோசடி வழக்கில், டில்லியைச் சேர்ந்த ராபிடோ பைக் டாக்சி டிரைவர் ஒருவரின் வங்கிக் கணக்கில், 331 கோடி ரூபாய் மதிப்பில் பரிவர்த்தனைகள் நடந்துள்ளதை அமலாக்கத் துறையினர் கண்டறிந்து உள்ளனர். இது குறித்து, அமலாக்கத் துறை வட்டாரங்கள் கூறியதாவது: இந்த பண மோடி வழக்கில், டில்லியைச் சேர்ந்த, 'ராபிடோ' டிரைவர் ஒருவரின் வங்கிக் கணக்கில், கடந்தாண்டு ஆக., 19 முதல் இந்தாண்டு ஏப்., 16 வரையிலான எட்டு மாத காலத்தில், 331.36 கோடி ரூபாய் மதிப்பில் பணப் பரிவர்த்தனைகள் நடந்துள்ளன. இந்த வங்கிக் கணக்குக்கு அடையாளம் தெரியாத நபர்கள் மூலம் பெரும் தொகை வந்துள்ளது. வரவு வைக்கப்பட்ட உடனே, சந்தேகத்திற்கிடமான வங்கிக் கணக்குகளுக்கு தொகை மாற்றப்பட்டு உள்ளது. இந்த பரிவர்த்தனைகள் குறித்து தனக்கு எதுவும் தெரியாது என்றும், வயிற்றுப் பிழைப்புக்காக தினசரி, 500 - 600 ரூபாய்க்கு பைக் டாக்சி ஓட்டுவதாகவும், சிறிய வீட்டில் வசித்து வருவதாகவும் அந்த டிரைவர் கூறினார். அவரது ஆவணங்களை பயன்படுத்தி, வங்கிக் கணக்கை மோசடி கும்பல் துவங்கியிருக்கலாம் என, சந்தேகிக்கப்படுகிறது. இந்த வங்கிக் கணக்கிலிருந்து, 2024 நவம்பரில், ராஜஸ்தானின் உதய்பூரில் உள்ள நட்சத்திர விடுதியில் நடந்த ஆடம்பர திருமணத்துக்கு ஒரு கோடி ரூபாய் செலவிடப்பட்டு உள்ளது. இந்த திருமணம் குஜராத்தைச் சேர்ந்த இளம் அரசியல்வாதியுடன் தொடர்புடையது. விசாரணைக்கு நேரில் ஆஜராகும்படி, விரைவில் அவருக்கு சம்மன் அனுப்பப்படும். இவ்வாறு அந்த வட்டாரங்கள் கூறின.