சாத்விக்-சிராக் ஜோடி தோல்வி * சிங்கப்பூர் பாட்மின்டனில்...

சிங்கப்பூர்: சிங்கப்பூர் ஓபன் பாட்மின்டன் முதல் சுற்றில் இந்தியாவின் சாத்விக்-சிராக் ஜோடி அதிர்ச்சி தோல்வியடைந்தது.சிங்கப்பூரில் சர்வதேச பாட்மின்டன் தொடர் நேற்று துவங்கியது. ஆண்கள் இரட்டையர் முதல் சுற்றில் உலகின் 'நம்பர்-1', இந்தியாவின் சாத்விக்சாய்ராஜ், சிராக் ஷெட்டி ஜோடி, உலகத் தரவரிசையில் 34வது இடத்திலுள்ள டென்மார்க்கின் லன்கார்டு, வெஸ்டர்கார்டு ஜோடியை சந்தித்தது. முதல் செட்டில் இழுபறி நீடித்தது. ஒருகட்டத்தில் 20-18 என முன்னிலையில் இருந்த இந்திய ஜோடி, கடைசியில் 20-22 என செட்டை கோட்டை விட்டது. இரண்டாவது செட்டிலும் 15-13 என முந்திய இந்திய ஜோடி 18-21 என நழுவவிட்டது. முடிவில் இத்தொடரில் கோப்பை வெல்லும் என நம்பப்பட்ட இந்திய ஜோடி, முதல் சுற்றில் 20-22, 18-21 என தோற்று வெளியேறியது. ஆண்கள் ஒற்றையர் முதல் சுற்றில் இந்தியாவின் பிரியான்ஷு, 21-23, 19-21 என சீனாவின் லி சியுக்கிடம் போராடி தோல்வியடைந்தார். பெண்கள் ஒற்றையரில் இந்தியாவின் ஆகர்ஷி, 19-21, 20-22 என தாய்லாந்தின் பார்ச்பிச்சாவிடம் முதல் சுற்றில் வீழ்ந்தார். பெண்கள் இரட்டையர் முதல் சுற்றில் இந்தியாவின் ருதுபர்ணா, ஸ்வேதாபர்ணா ஜோடி 12-21, 21-12, 13-21 என சீன தைபேவின் சிங் ஹுய், சிங் டன் ஜோடியிடம் தோற்றது.