செய்யூர் பஜாரில் கழிப்பறை வசதி தேவை

செய்யூர், செய்யூர் பஜார் பகுதியில் வட்டாட்சியர் அலுவலகம், சார் - பதிவாளர் அலுவலகம், நீதிமன்றம், அரசு பள்ளிகள், மருத்துவமனை உள்ளிட்ட பல்வேறு அரசு அலுவலகங்கள் செயல்படுகின்றன.மேலும் தேவராஜபுரம், சால்ட் காலனி, பாளையர்மடம் உள்ளிட்ட 5க்கும் மேற்பட்ட கிராம மக்கள், வெளியூர்களுக்கு செல்ல செய்யூர் பஜார் பகுதியில் உள்ள பேருந்து நிறுத்தத்தை பயன்படுத்துகின்றனர்.இதன்படி, தினசரி நுாற்றுக்கணக்கான பொதுமக்கள் பஜார் பகுதிக்கு வந்து செல்கின்றனர்.பொதுமக்கள் நடமாட்டத்துடன் பரபரப்பாக காணப்படும் செய்யூர் பஜார் பகுதியில், பொதுக்கழிப்பறை வசதி இல்லாததால் பெண்கள், குழந்தைகள், முதியவர்கள் என, அனைத்து தரப்பு மக்களும் சிரமப்படுகின்றனர்.எனவே, ஊரக வளர்ச்சித் துறை அதிகாரிகள், பஜாரின் மையப்பகுதியில் உள்ள பழைய காவல் நிலைய கட்டடம் உள்ள இடத்தில், பொதுக்கழிப்பறை அமைக்க நடவடிக்கை எடுக்க வேண்டும் என, சமூக ஆர்வலர்கள் எதிர்பார்க்கின்றனர்.