வடமாநில பெண் கழுத்தறுத்து கொலை

காஞ்சிபுரம்: வாலாஜாபாத் அருகே ஊத்துக்காடு கிராம குளக்கரையில், கழுத்தறுத்து கொலை செய்யப்பட்ட வடமாநில பெண்ணின் சடலத்தை, போலீசார் மீட்டு, விசாரித்து வருகின்றனர். காஞ்சிபுரம் மாவட்டம், வாலாஜாபாத் ஒன்றியம், ஊத்துக்காடு பெருமாள் கோவில் மற்றும் எல்லையம்மன் கோவில் அருகே பொதுக்குளம் உள்ளது. இந்த குளத்தின் கரையில், கழுத்தறுக்கப்பட்ட நிலையில் பெண் சடலம் கிடந்தது. நேற்று காலை, தகலறிந்து அங்கு சென்ற போலீசார், அப்பெண்ணின் சடலத்தை மீட்டு, பிரேத பரிசோதனைக்காக காஞ்சிபுரம் அரசு பொது மருத்துவமனைக்கு அனுப்பினர். இறந்த பெண், சத்தீஸ்கர் மாநிலத்தைச் சேர்ந்த யசோதா, 38, என்பது, போலீசாரின் முதற்கட்ட விசாரணையில் தெரிய வந்தது. மேலும், ஊத்துக்காடு கிராமத்தில் வாடகை வீடு ஒன்றில் இரண்டு ஆண்களோடு தங்கி, அதே பகுதியில் கட்டட பணிகள் மேற்கொண்டு வந்ததும் தெரிந்தது. யசோதாவுடன் தங்கியிருந்த இருவரை, போலீசார் தேடி வருகின்றனர். அதன் பின், யசோதா இறப்பு குறித்து முழு காரணங்கள் தெரியவரும் என, போலீசார் தெரிவித்தனர்.