மஞ்சள் வரத்து குறைந்தது; 1,000 மூட்டை சரிவு

ஆத்துார் : சேலம் மாவட்டம் ஆத்துார், புதுப்பேட்டை தொடக்க வேளாண் உற்பத்தியாளர் கூட்டுறவு சங்கத்தில் மஞ்சள் ஏலம் நேற்று முன்தினம் நடந்தது. சுற்றுவட்டார விவசாயிகள், 3,489 மஞ்சள் மூட்டைகளை(2,039.38 குவிண்டால்) கொண்டு வந்தனர். ஆத்துார், சேலம், ஈரோடு, உள்ளிட்ட பகுதி வியாபாரிகள், தரத்துக்கு ஏற்ப விலை நிர்ணயித்தனர். குவிண்டால் விரலி ரகம், 16,569 முதல், 20,633 ரூபாய்; உருண்டை ரகம், 14,869 முதல், 17,772 ரூபாய்; பனங்காலி மஞ்சள்(தாய் மஞ்சள்), 22,469 முதல், 28,779 ரூபாய் வரை விலைபோனது. 3,489 மூட்டைகள் மூலம், 3.50 கோடி ரூபாய்க்கு வர்த்தகம் நடந்தது. கடந்த வாரத்தை விட, 1,000 மூட்டைகள் வரத்து குறைந்தது. குவிண்டாலுக்கு விரலி ரகம், 600 ரூபாய்; உருண்டை ரகம், 927 ரூபாய் விலை குறைந்த நிலையில், பனங்காலி, 110 ரூபாய் விலை உயர்ந்தது.