அன்னூர் மன்னீஸ்வரர் சூரிய வாகனத்தில் திருவீதி உலா

அன்னூர்: அன்னூர் மன்னீஸ்வரர் கோவில் தேர்த் திருவிழாவில் நேற்று சூரிய வாகனத்தில் சுவாமி திருவீதி உலா நடந்தது. மேற்றலை தஞ்சாவூர் என்று அழைக்கப்படும், ஆயிரம் ஆண்டுகள் பழமையான அன்னூர் மன்னீஸ்வரர் கோவிலில், 26ம் ஆண்டு தேர்த் திருவிழா கடந்த, 24ம் தேதி கிராம தேவதை வழிபாடுடன் துவங்கியது. நேற்று முன்தினம் காலையில் கொடியேற்றம் நடந்தது. கயிலை வாத்தியத்துடன், சுவாமி திருவீதி உலா நடந்தது. புளியம்பட்டி, அறுபத்து மூவர் நற்பணி மன்றத்தினர் திருமுறை வாசித்தனர். நேற்று காலை சூரிய வாகனத்தில் அருந்தவச் செல்வி உடனமர் மன்னீஸ்வரர் ஓதிமலை ரோடு, சத்தி ரோடு, மெயின் ரோடு வழியாக உலா வந்து அருள் பாலித்தார். மாலையில் சந்திர வாகனத்தில் சுவாமி உலா நடந்தது. வரும், 27ம் தேதி இரவு 7:00 மணிக்கு பூத வாகனத்திலும், 28ம் தேதி இரவு புஷ்ப பல்லாக்கிலும் ஊர்வலம் நடைபெறுகிறது. வரும், 29ம் தேதி காலை பஞ்ச மூர்த்திகளுக்கு அபிஷேகமும், மாலையில் பஞ்ச மூர்த்திகள் திருவீதி உலாவும் நடைபெறுகிறது. வரும், 30ம் தேதி காலை தேவார இன்னிசையும், காலை 11:00 மணிக்கு திருக்கல்யாண உற்சவமும், இரவு 7:00 மணிக்கு யானை வாகனத்தில் சுவாமி திருவீதி உலாவும் நடைபெறுகிறது. வருகிற, 31ம் தேதி காலை 7:15 மணிக்கு சுவாமி தேருக்கு எழுந்தருளுகிறார். காலை 10:30 மணிக்கு தேரோட்டம் துவங்கி நடைபெறுகிறது.