மாணவர்களின் நல்வாழ்க்கைக்கு அடித்தளமிடும் அரசுப்பள்ளி

கடலுார் மாவட்டம், நடுவீரப்பட்டு கிராமத்தில் கடந்த, 1965 ம் ஆண்டு உயர்நிலைப்பள்ளியாக துவங்கப்பட்டு, கடந்த, 1992 ஆம் ஆண்டு மேல்நிலைப்பள்ளியாக தரம் உயர்த்தப்பட்டது. நடுவீரப்பட்டு கிராமத்தை மையமாக கொண்டு, 15க்கும் மேற்பட்ட கிராமங்களில் இருந்து, 1500 மாணவர்கள் இப்பள்ளியில் பயின்றனர். பள்ளியில் 30 ஆசிரியர்கள் பள்ளியில் பணியில் உள்ளனர். இப்பள்ளியில் படிக்கும் மாணவர்களின் கல்வி திறனை வளர்க்கும் நோக்கில் தலைமை ஆசிரியர் மற்றும் ஆசிரியர்கள் பல நடவடிக்கைகள் எடுத்து வருகின்றனர். பள்ளியில் நாட்டுநலப்பணித்திட்டம், சாரணர் இயக்கம், பசுமைப்படை, தேசிய மாணவர் படை, இளையோர் செஞ்சிலுவை சங்கம் உள்ளிட்ட அரசு திட்டத்தின் மூலம் பொதுமக்களுக்கு உதவிகள் செய்யப்பட்டு வருகிறது. இப்பள்ளி மாணவி சிவரஞ்சனி கடந்த 2024-25 கல்வி ஆண்டில் படித்து, நீட் தேர்வில் அரசின் 7.5 சதவீத ஒதுக்கீட்டில் கீழ்பாக்கம் அரசு மருத்துவ கல்லுாரியில் மருத்துவ படிப்பில் சேர்ந்து படித்து வருகிறார். பள்ளி வளர்ச்சியில் மாணவர்கள், ஆசிரியர்கள் பங்களிப்பு : பள்ளியின் முன்னாள் மாணவர் தமிழ்செல்வன், 50 ஆயிரம் ரூபாய் மதிப்பில், வகுப்பறைகளை சீரமைத்துக் கொடுத்தார். மேலும் பள்ளியின் முன்னாள் தமிழ் ஆசிரியர் கோதை நாயகி, தமது சொந்த செலவில் ஒரு லட்சம் ரூபாய் மதிப்பில் பாதுகாப்பிற்கான கிரில் கேட் அமைத்துக் கொடுத்தார். பள்ளியின் முன்னாள் தலைமை ஆசிரியர்கள் சுப்பிரமணியன், ஜானகிராமன், அன்பழகி, கார்த்திகேயன், பெரியசாமி ஆகியோர் தங்களது பணி காலத்தில் மாணவர்களின் வளர்ச்சிக்கு கடுமையாக உழைத்ததால் பள்ளி தற்போது நல்வளர்ச்சியடைந்துள்ளது.

ஒழுக்கத்துடன் கூடிய கல்வி

மாணவர்களுக்கு ஒழுக்கத்தடன் கூடிய கல்வியை அளிப்பதே கடமை. நான் இப்பள்ளியில் தலைமை ஆசிரியராக கடந்த ஓராண்டிற்கு முன் பொறுப்பேற்றேன். 10ம் வகுப்பு மற்றும் பிளஸ் 2 அரசு பொதுத்தேர்வு தேர்ச்சி விகிதத்தை ஆசிரியர்கள் உறுதுணையோடு அதிகரித்துள்ளேன். ஆசிரியர்கள், ஒவ்வொருவரும் பள்ளியின் மீதான அக்கறையால், மாணவர்களின் வாழ்க்கை மற்றும் கல்வி தரம் உயர்ந்திட அயராது பாடுபடுகின்றனர். பள்ளியின் அடிப்படை கட்டமைப்புகள், பள்ளி மேலாண்மைக்குழு மற்றும் பெற்றோர் ஆசிரியர் கழகத்தின் முழு ஒத்துழைப்போடு மேம்படுத்தப்பட்டு வருகிறது. பள்ளி ஆசிரியை மகாலட்சுமி கொரோனா காலத்தில் மாணவர்களுக்கு அவர்கள் வசிக்கும் பகுதிக்கே சென்று பாடம் நடத்தி, பள்ளிக்கு பெருமை சேர்த்தார். வேதியியல் முதுகலை ஆசிரியர் பாக்கியராஜ் மேற்பார்வையில் கடந்த, 2023 ம் ஆண்டு முதல் தேசிய மாணவர் படை உருவாக்கப்பட்டு சிறப்பாக செயல்பட்டு வருகிறது. கிராமப்புற மாணவர்கள் அதிகளவில் படிப்பதால், மாணவர்களுக்கு கல்வியின் முக்கியத்துவம், அவசியத்தை உணர்த்தும் விதத்தில் கற்பிக்கப்படுகிறது. -சாந்தகுமாரி, பள்ளி தலைமை ஆசிரியர்

விளையாட்டு போட்டிகள் அசத்தல்

இப்பள்ளியில் கடந்த, 2006ம் ஆண்டு முதல் பணியாற்றி வருகிறேன். மாணவர்களின் நலனை முதன்மையாக கொண்டு செயல்படுகிறேன். பள்ளியின் முன்னாள் மாணவர்களை ஒருங்கிணைத்து செயலாற்றுகிறேன். பள்ளியின் கட்டமைப்பை தனியார் பள்ளிகளுக்கு நிகராக உருவாக்க முயற்சி செய்து வருகிறேன். இயற்பியல் பாடத்தில் மாவட்ட, மாநில கருத்தாளராக உள்ளதால் பாடத்தில் மாணவர்களின் உள்நோக்கம் அறிந்து பாடம் நடத்துவேன். எங்கள் பள்ளி மாணவர்கள் மாநில, மாவட்ட விளையாட்டு போட்டிகளில் பங்கேற்று வெற்றி வெற்றுள்ளனர். இந்த கல்வியாண்டில் அனைத்து ஆசிரியர்களின் ஒத்துழைப்போடு குறுவட்ட விளையாட்டுப்போட்டிகள் நடத்தியதில் பெருமிதம் கொள்கிறோம். -செந்தில்குமார், உதவி தலைமை ஆசிரியர்

பள்ளியால் பெருமை

நான் இப்பள்ளியில் கடந்த, 1998ம் ஆண்டு முதல் 2018 வரை வேதியியல் முதுகலை ஆசிரியராக பணியாற்றினேன். கடந்த, 2018ம் ஆண்டு முதல் 2023ம் ஆண்டு வரை தலைமை ஆசிரியராக இப்பள்ளியில் பணியாற்றி ஓய்வு பெற்றேன். இங்கு பணியாற்றிய, 26 ஆண்டுகளில் பல மாணவர்களுக்கு உயர் படிப்பு மற்றும் பட்டங்களைப் பெற வழிகாட்டியுள்ளேன். பணிக்காலத்தில் புதிய பாடநுால், 9ம் வகுப்பு வேதியியல் பாடத்தை எழுதியுள்ளேன். மாநில, மாவட்ட வேதியியல் கருத்தாளராக செயல்பட்டுள்ளேன். பள்ளிக்கு என் பணியின் நினைவாக விழா மேடை மற்றும் கிரில் கேட் அமைத்துக்கொடுத்துள்ளேன். கடந்த, 2023ம் ஆண்டு தமிழக அரசின் மாநில நல்லாசிரியர் விருதாளராக தேர்ந்தெடுக்கப்பட்டேன். இப்பள்ளியால் நான் பெருமையடைந்தேன். -ஜெகத்ரட்சகன், முன்னாள் தலைமை ஆசிரியர்

மாணவர்களுக்கு வழிகாட்டல்

நடுவீரப்பட்டு அரசு மேல்நிலைப்பள்ளியில் கடந்த 2000 - 2022ம் ஆண்டு வரை 22 ஆண்டுகள் விலங்கியல் முதுகலை ஆசிரியராக பணிபுரிந்தேன். நான் பணிபுரிந்த காலத்தில் மாணவர்களின் கல்வி தரத்தினை உயர்த்திட பாடுபட்டேன். அரசால் வழங்கப்படும் கல்வி உதவி தொகையினை ஆயிரக்கணக்கான மாணவர்களுக்கு வாங்கிக் கொடுத்துள்ளேன். மாணவர்களின் திறன் மேம்பாடு, உயர்கல்வி வழிகாட்டலில் முக்கிய பங்காற்றியதில் பெருமை கொள்கிறேன். -அருண், பூண்டியாங்குப்பம் அரசுப்பள்ளி தலைமை ஆசிரியர்

ஆசிரியர்களின் கடின உழைப்பு

நடுவீரப்பட்டு அரசு உயர்நிலைப்பள்ளியாக இருந்த போது கடந்த, 1972ம் ஆண்டு பதினொன்றாம் வகுப்பில் முதல் மாணவராக தேர்ச்சி பெற்றேன். பின் புதுச்சேரியில், பி.யூ.சி., மற்றும் இடைநிலை ஆசிரியர் பயிற்சி பெற்று இடைநிலை ஆசிரியராக புதுவையில் பணியில் சேர்ந்தேன். பின், முதுநிலை தமிழாசிரியராக பணியில் சேர்ந்து மாணவர்களுக்காக பணி ஓய்வு பெற்றேன். எனக்கு வழிகாட்டிய நடுவீரப்பட்டு பள்ளி தலைமை ஆசிரியர் மற்றும் ஆசிரியர்களுக்கு நன்றி தெரிவிக்கிறேன். கடந்த 3 ஆண்டுகளாக, பள்ளிக்கால நண்பர்களுடன் இணைந்து அரசு பொதுத்தேர்வில் அதிக மதிப்பெண்கள் பெறும் மாணவ, மாணவிகளுக்கு பரிசு மற்றும் கேடயம் வழங்கி வருகிறோம். மாணவர்களுக்காக கடுமையாக உழைக்கும் இப்பள்ளி ஆசிரியர்களை மனதார பாராட்டுகிறேன். -மருதவாணன், முன்னாள் மாணவர்

மாணவர்களுக்கு ஊக்கப்பரிசு

இப்பள்ளியில் கடந்த 1972ம் ஆண்டு வரை படித்தேன். பள்ளி படிப்பை முடித்துவிட்டு மேற்படிப்பை கடலுாரிலும், மைசூரிலும் படித்துவிட்டு, புதுச்சேரி அரசுப்பள்ளியில் ஆசிரியராக பணிக்கு சேர்ந்தேன். தலைமை ஆசிரியர் வரை பணி உயர்வு பெற்றேன். புதுச்சேரி அரசினால் தேசிய நல்லாசிரியராக தேர்வு செய்யப்பட்டேன். எனது பணியை பாராட்டி, பிரான்சில் சார்போன் பல்கலைக்கழகத்தில் கவுரவ முனைவர் பட்டம் கொடுத்தனர். நான் பயின்ற இந்த பள்ளியும், எனது ஆசிரியர்களும் தான் நான் பெற்ற பெருமைகளுக்கு காரணம். ஆசிரியர்கள் அனைவரும் எனக்கு வாழ்வு கொடுத்த கடவுள்கள். நாம் படித்த பள்ளியில் படிக்கும் மாணவர்களை ஊக்குவிக்கும் வகையில் ஊக்கப்பரிசுகளை வழங்குகிறோம். -வெற்றிவேல், முன்னாள் மாணவர்

மாணவர்களுக்காக ஆலோசனை

இப்பள்ளியின் முன்னாள் மாணவன் என்பதில் பெருமிதம் கொள்கிறேன். இப்பள்ளி முன்னாள் மாணவர்கள் பலர் அரசு உயர்பணியில் உள்ளனர். நான் சி.என்.பாளையம் அரசுப்பள்ளியில் பெற்றோர் ஆசிரியர் கழக துணைத்தலைவராக பல ஆண்டுகள் இருந்தேன். நடுவீரப்பட்டு பள்ளி தலைமை ஆசிரியர் சாந்தகுமார், சி.என்.பாளையம் அரசு மேல்நிலைப்பள்ளியில் உதவி தலைமை ஆசிரியராக இருக்கும் போது, அவருடன் மாணவர்களின் நலனுக்காக ஆலோசனை செய்துள்ளேன். தற்போது படிக்கும் மாணவர்களின் மனநிலையை உணர்ந்து அவர்களின் திறனை மேம்படுத்தும் வகையில் இப்பள்ளி தலைமை ஆசிரியர் உள்ளிட்டோர், பணி செய்வது பாராட்டுக்குரியது. -நடராஜன், முன்னாள் மாணவர்

பள்ளிக்கு கல்வி உபகரணங்கள்

நான் இப்பள்ளியில் கடந்த 2009ம் ஆண்டு படித்து முடித்தேன். தற்போது நல்ல வேலையில் உள்ளேன். நான் பணிபுரியும் பேங்கஸ் டெக்னாலஜி நிறுவனத்தின் சி.எஸ்.ஆர்.நிதியிலிருந்து கல்வி உபகரணங்கள் மற்றும் டேபிள், சேர் உள்ளிட்ட பொருட்களை வாங்கித்தந்தேன். மேலும் சுற்றுப்பகுதியிலுள்ள பல பள்ளிகளுக்கு 52 லட்ச ரூபாய் மதிப்பில் கல்வி உபகரணங்களை பெற்றுத்தந்துள்ளேன். எனது நிறுவனம் பள்ளிகளுக்கு தேவையான பொருட்களை வாங்கிக்கொடுத்ததற்காக நன்றி தெரிவிக்கிறேன். -கணபதி, முன்னாள் மாணவர்