பெரியாவுடையார் கோயில் சாலை சேதம்

பழநி: பழநி கோதைமங்கலம் ஊராட்சியில் பெரியாவுடையார் கோயில் செல்லும் சாலை சேதமடைந்துள்ளது. குப்பை கொட்ட தனி இடம் இல்லாதது குறித்து ஊராட்சி நிர்வாகம் நடவடிக்கை எடுக்க வேண்டும் என மக்கள் கோரி வருகின்றனர். குட்டைக்காடு, குறிஞ்சி நகர், கோதைமங்கலம், ஜவகர் நகர் உள்ளிட்ட பகுதிகளை கொண்ட இங்கு நாய் தொல்லை அதிக அளவில் உள்ளது. நுாலகம் செயல்படவில்லை. சாலைகள் சேதமடைந்துள்ளது. இதுகுறித்து புகார் தெரிவிக்க வழி இன்றி பொதுமக்கள் அவதிப்படுகின்றனர் கோதைமங்கலம் வியாபாரி மருதபாணி கூறுகையில்,'' பழநி கோயில் நிர்வாகத்திற்கு உட்பட்ட பல ஆயிரம் ஆண்டுகள் பழமையான பெரியாவுடையார் கோயில் செல்லும் சாலை சேதமடைந்து பல ஆண்டுகளாக உள்ளது. மழை பெய்தால் டூவீலரில் செல்வோர் வழுக்கி விழும் நிலை உள்ளது. இந்த பாதையில் தான் விவசாயிகள் விளை பொருட்களை எடுத்து செல்கின்றனர். வெளியூரிலிருந்து பிரதோஷ வழிபாடுக்காக அதிகளவில் பக்தர்களும் வருகின்றனர். இதை சீரமைக்க வேண்டும் '' என்றார் விவசாயி பாலமோகன் கூறுகையில் ''கோதைமங்கலம் பகுதியில் குப்பை கொட்ட தனி இடம் இல்லை. ஊராட்சி சொந்தமாக குப்பை கொட்ட இடம் வாங்க வேண்டும். தெருவிளக்குகள் 24 மணி நேரமும் எரிந்து மின்சாரம் வீணாகிறது. புதிதாக அமைக்கப்பட்ட கான் கிரீட் சாலைகள் குண்டு குழியுமாக சேதமடைந்துள்ளதால் நாய் தொல்லை அதிகம் உள்ளது'' என்றார்.