கோபியில் அ.தி.மு.க., பிரசார கூட்டம்; இ.பி.எஸ்., பங்கேற்பு

கோபி, 'மக்களை காப்போம், தமிழகத்தை மீட்போம்' பிரசார பொதுக்கூட்டத்தில், அ.தி.மு.க., பொது செயலர் இ.பி.எஸ்., பங்கேற்றுள்ளார். இதன்படி ஈரோடு மாவட்டம் கோபியில், ராமசாமி நகர் அருகே இன்று மாலை, 5:00 மணிக்கு நடக்கும் பொதுக்கூட்டத்தில் பங்கேற்கிறார். இதற்காக இடத்தை தயார் செய்யும் பணி நேற்று தீவிரமாக நடந்தது. சேலத்தில் இருந்து சித்தோடு வழியாக காரில் கோபிக்கு வரும் இ.பி.எஸ்.,சுக்கு, அமலா பள்ளி பிரிவு என்ற இடத்தில் கட்சியினர் வரவேற்பு கொடுக்கவுள்ளனர். அ.தி.மு.க.,வில் இருந்து விலகி, த.வெ.க.,வில் முன்னாள் அமைச்சர் செங்கோட்டையன் சேர்ந்துள்ள நிலையில், அவரது சொந்த தொகுதியான கோபியில் இன்று நடக்கும் இந்தக் கூட்டம், அ.தி.மு.க.,வினர் மத்தியில் முக்கியத்துவம் வாய்ந்ததாக கருதப்படுகிறது.த.வெ.க.,வில் சேர்ந்த நிலையில், கோபிக்கு நேற்று முன்தினம் இரவு திரும்பிய செங்கோட்டையன் திரண்டிருந்த ஆதரவாளர்கள் மத்தியில் பேசுகையில், ''எனது காலை இழுத்து விட்டவர், நாளை மறுதினம் நம்ம ஊருக்கு வருகிறார்,'' என்று, இ.பி.எஸ்., பெயரை குறிப்பிடாமல் விமர்சனம் செய்தார்.எனவே செங்கோட்டையனின் இந்த பேச்சுக்கு, இ.பி.எஸ்., நிச்சயம் பதிலடி தருவார் என்பது, தொண்டர்கள் மத்தியில் பெரும் எதிர்பார்ப்பாக அமைந்துள்ளது.