மாற்றுத்திறனாளிகள் சிறப்பு முகாமில் 20 பேருக்கு தேசிய அடையாள அட்டை

கள்ளக்குறிச்சி: பிரம்மகுண்டம் அரசு மேல்நிலைப்பள்ளியில் நடந்த மாற்றுத்திறளிகளுக்கான சிறப்பு முகாமில், 20 பேருக்கு தேசிய அடையாள அட்டைகள் வழங்கப்பட்டது. சங்கராபுரம் வட்டம் பிரம்மகுண்டம் அரசு மேல்நிலைப்பள்ளியில் நடந்த 'நலம் காக்கும் ஸ்டாலின்' திட்ட முகாமுடன் இணைந்து, மாற்றுத்திறனாளிகளுக்கான அடையாள அட்டை வழங்குவதற்கான சிறப்பு மருத்துவ பரிசோதனை முகாம் நடந்தது. மாவட்ட மாற்றுத்திறனாளிகள் நலத்துறை அலுவலர் அந்தோணிராஜ் தலைமை தாங்கினார். அரசு எலும்பு முறிவு டாக்டர் முகமது இமாம்சார்ஜி, மனநல டாக்டர் சரஸ்வதி, கண் டாக்டர் ஹெலன், காது மூக்கு தொண்டை டாக்டர் ராஜேஷ்வரி உள்ளிட்டோர் கொண்ட மருத்துவ குழுவினர் 50 மாற்றுத்திறனாளிகளை பரிசோதித்தனர். அதில் தகுதிவாய்ந்த, 20 பேருக்கு மருத்துவ சான்றுடன் கூடிய தேசிய அடையாள அட்டை வழங்கப்பட்டது. 15 பேர்களுக்கு உதவி உபகரணங்கள் வேண்டி ஆன்லைனில் பதிவேற்றம் செய்யப்பட்டது.