டிட்வா புயலை எதிர்கொள்ள 256 தற்காலிக முகாம்கள் 1,080 மீட்பு உபகரணங்கள் தயார் : கலெக்டர் தகவல்

கள்ளக்குறிச்சி: கள்ளக்குறிச்சி மாவட்டத்தில் 'டிட்வா' புயலை எதிர்கொள்ள 256 தற்காலிக நிவாரண முகாம்கள், 1,080 மீட்பு உபகரணங்கள் தயார் நிலையில் இருப்பதாக கலெக்டர் தெரிவித்துள்ளார். கள்ளக்குறிச்சி மாவட்டத்திற்கு, 'டிட்வா' புயல் காரணமாக ஆரஞ்சு அலர்ட் விடுக்கப்பட்டுள்ளது. இதையடுத்து, புயல் முன்னெச்சரிக்கை நடவடிக்கை பணிகள் குறித்து அனைத்துத்துறை அலுவலர்களுடனான ஆய்வு கூட்டம் நேற்று நடந்தது. கலெக்டர் பிரசாந்த் தலைமை தாங்கினார். டி.ஆர்.ஓ., ஜீவா, கலெக்டரின் நேர்முக உதவியாளர் (பொது) தனலட்சுமி முன்னிலை வகித்தனர். மாவட்டத்தில் மேற்கொள்ளப்பட்டுள்ள முன்னெச்சரிக்கை பணிகள் குறித்து அனைத்து துறை அலுவலர்களிடமும் கேட்டறியப்பட்டது. கோமுகி மற்றும் மணிமுக்தா அணைகள் மற்றும் ஏரி, குளங்களின் நீர் இருப்புகளை தொடர்ந்து கண்காணிக்க வேண்டும். தீயணைப்புத்துறை வீரர்கள் மற்றும் நெடுஞ்சாலைத்துறை அலுவலர்கள் மீட்பு பணி உபகரணங்களுடன் தயார் நிலையில் இருத்தல், தடையற்ற மின்சாரம் வழங்குவதை உறுதி செய்தல், ஊரக வளர்ச்சி துறை சார்பில் பொதுமக்களுக்கு தடையின்றி குடிநீர் விநியோகம் செய்தல், சுகாதார துறை சார்பில் தேவையான மருந்துகள் இருப்பு மற்றும் மருத்துவர்கள் தயார் நிலையில் இருத்தல், கூட்டுறவு துறை சார்பில் ரேஷன் கடைகள் மூலம் பொதுமக்களுக்கு தடையின்றி அத்தியாவசிய பொருட்கள் வழங்க வேண்டும் என அறிவுறுத்தப்பட்டது. கலெக்டர் பிரசாந்த் கூறுகையில்; கலெக்டர் அலுவலகத்தில் அனைத்து துறை அலுவலர்களை உள்ளடக்கிய அவசர கால கட்டுப்பாட்டு அறை 24 மணிநேரமும் செயல்படும் வகையில் அமைக்கப்பட்டுள்ளது. பொதுமக்கள் தங்களது பகுதியில் ஏற்படும் இயற்கை இடர்பாடுகள் குறித்த தகவலை 1077 என்ற கட்டணமில்லா தொலைபேசி எண்ணிலும், 04151 - 228801 என்ற தொலைபேசி எண்ணிலும் தெரிவிக்கலாம். அனைத்து தாலுகா அலுவலகங்களிலும் கட்டுப்பாட்டு அறைகள் அமைக்கப்பட்டுள்ளன. மழை பாதிப்பை கண்காணிக்க தாலுகா அளவில் 7 துணை ஆட்சியர்கள், குறுவட்ட அளவில் 25 மண்டல தலைவர்களும் நியமிக்கப்பட்டுள்ளனர். பாதிப்பு அதிகம் ஏற்படும் பகுதிகளில் உள்ள பொதுமக்களை தங்க வைக்க 256 தற்காலிக நிவாரண முகாம்கள், 1,080 மீட்பு உபகரணங்கள் தயார் நிலையில் உள்ளதாக தெரிவித்தார். கூட்டத்தில் நெடுஞ்சாலைத்துறை, மின்சார வாரியம், ஊரக வளர்ச்சித்துறை, தீயணைப்புத் துறை, வேளாண்மைத் துறை, கூட்டுறவுத்துறை, வருவாய்த்துறை உட்பட பல்வேறு துறை சார்ந்த அலுவலர்கள் பங்கேற்றனர்.