திருநாவலுார் அருகே அரசு பஸ் மோதி கூலி தொழிலாளி பலி

உளுந்துார்பேட்டை: நவ. 30-: திருநாவலுார் அருகே அரசு பஸ் மோதி கூலி தொழிலாளி பரிதாபமாக இறந்தார். உளுந்துார்பேட்டை அடுத்த சிறுத்தனுார் கிராமத்தைச் சேர்ந்தவர் அமாவாசை, 55; கூலி தொழிலாளி. நேற்று முன்தினம் மதியம் 1:00 மணிக்கு, மடப்பட்டு சாலையோரம் நடந்து சென்றார். அப்போது, குடியாத்தத்தில் இருந்து சிதம்பரம் நோக்கிச் சென்ற அரசு பஸ், நடந்து சென்ற அமாவாசை மீது மோதியது. படுகாயமடைந்த அமாவாசையை உடன் அருகில் இருந்தவர்கள் மீட்டு உளுந்துார்பேட்டை அரசு மருத்துவமனையில் சேர்த்தனர். மேல் சிகிச்சைக்காக முண்டியம்பாக்கம் அரசு மருத்துவ கல்லுாரி மருத்துவமனையில் அனுமதிக்கப்பட்ட அமாவாசை சிகிச்சை பலனின்றி நேற்று இறந்தார். இது குறித்து திருநாவலுார் போலீசார் வழக்கு பதிந்து விசாரணை செய்து வருகின்றனர்.