10 லெஹார்ன் கோழி குஞ்சு காஞ்சியில் ரூ.100க்கு விற்பனை

காஞ்சிபுரம்:தர்மபுரியைச் சேர்ந்த கோழி குஞ்சு வியாபாரிகள், காஞ்சிபுரத்தில், பிரதான சாலையோரத்தில், நடைபாதை கடை அமைத்து, கலர் கோழி குஞ்சு விற்பனை செய்கின்றனர்.இதுகுறித்து தர்மபுரியைச் சேர்ந்த வியாபாரி எம்.சத்யராஜ் கூறியதாவது:தர்மபுரி மாவட்டத்தில் இருந்து, 20க்கும் மேற்பட்டோர், கோழி குஞ்சு கூடைகளுடன் டூ -- வீலரில், காஞ்சிபுரம், உத்திரமேரூர், ஸ்ரீபெரும்புதுார், வாலாஜாபாத், செய்யாறு, அரக்கோணம் உள்ளிட்ட ஊர்களில் கோழி குஞ்சுகளை விற்பனை செய்ய கொண்டு வந்துள்ளோம். 'லெஹார்ன்' வகை 10 கோழி குஞ்சுகள் 100 ரூபாய்க்கும், 4 குஞ்சுகள் 50 ரூபாய்க்கும் விற்பனை செய்கிறோம்.பல்வேறு வண்ணங்களில் கோழி குஞ்சுகள் இருப்பதால், சாலையில் செல்லும் வாகன ஓட்டிகள் ஆர்வத்துடன் வாங்கிச் செல்கின்றனர்.இவ்வாறு அவர் கூறினார்.