டிச., 2 முதல் 4 வரை ரேஷன் பொருட்கள் வீடு தேடி சப்ளை

கரூர், டிசம்பர் மாதம், 2 முதல் 4ம் தேதி வரை மாற்றுத்திறனாளி, முதியவர்களின் வீடுகளுக்கு சென்று, ரேஷன் பொருட்கள் வினியோகம் செய்யப்படும் என, கலெக்டர் தங்கவேல் தெரிவித்துள்ளார்.இது குறித்து, அவர் வெளியிட்ட அறிக்கையில் கூறியிருப்பதாவது:முதல்வரின் தாயுமானவர் திட்டத்தின் கீழ், வயது முதியவர்கள் மற்றும் மாற்றுத்திறனாளி குடும்ப அட்டைதாரர்களின் இல்லத்திற்கே சென்று அரிசி, சர்க்கரை உள்ளிட்ட ரேஷன் பொருட்கள் வினியோகம் செய்யப்பட்டு வருகிறது. இத்திட்டத்தின் கீழ் கரூர் மாவட்டத்தில், 728 ரேஷன் கடைகளை சேர்ந்த, 33,677 குடும்ப அட்டைதாரர்களுக்கு, அவர்களின் இல்லங்களுக்கே சென்று ரேஷன் பொருட்கள் வழங்கப்பட்டு வருகிறது.ஒவ்வொரு மாதமும், வாகனங்களில் பொருட்களை எடுத்து சென்று, ரேஷன் கடை ஊழியர்கள் வினியோகம் செய்து வருகின்றனர். இந்நிலையில் டிச., 2, 3, 4 ஆகிய நாட்களில் வயது முதிர்ந்தோர் மற்றும் மாற்றுத்திறனாளிகளின் வீடுகளுக்கு நேரடியாக சென்று, பொருட்களை வினியோகம் செய்ய அரசு உத்தரவிட்டுள்ளது. எனவே, பயனாளர்கள் மேற்கண்ட தேதிகளில், ரேஷன் பொருட்களை பெற்று கொள்ளலாம்.இவ்வாறு கூறியுள்ளார்.