ஸ்ரீ வற்றியம்மன் கோவில் கும்பாபிஷேக விழா

சூலுார்:சூலுார் ஸ்ரீ வற்றியம்மன் கோவில் கும்பாபிஷேக விழாவில், திரளான பக்தர்கள் பங்கேற்றனர்.சூலுார் புது பஸ் ஸ்டாண்ட் அருகேயுள்ள ஸ்ரீ வற்றியம்மன் கோவில், நுாற்றாண்டு பழமை வாய்ந்தது. கடந்த, 19ம் தேதி முகூர்த்த கால் வைத்தலுடன் கும்பாபிஷேக விழா துவங்கியது.நேற்று காலை 7:30க்கு, நான்காம் கால ஹோமம், நாடி சந்தானம், திருமுறை பாராயணம் நடந்தன. பூஜிக்கப்பட்ட புனித நீர் கலசங்கள், மேள, தாளத்துடன் கோவிலை சுற்றி எடுத்து வரப்பட்டன. 9:00 மணிக்கு, விமானத்துக்கு கும்பாபிஷேகம் நடந்தது. தொடர்ந்து ஸ்ரீ வற்றியம்மன் மற்றும் பரிவார தெய்வங்களுக்கு கும்பாபிஷேகம் செய்யப்பட்டது. மகா அபிஷேகம், தச தான, தரிசன பூஜைக்கு பின், மகா தீபாராதனை நடந்தது. திரளான பக்தர்கள் வழிபட்டனர். விழா ஏற்பாடுகளை, கோவில் கமிட்டியினர் செய்திருந்தனர்.