மழையில் தீயணைப்புத்துறை வீரர்களுக்கு நீச்சல் பயிற்சி

ராமநாதபுரம்: ராமநாதபுரத்தில் மழைக்கு நடுவே தீயணைப்பு படையினருக்கு நீச்சல் பயிற்சி அளிக்கப்பட்டது. பருவமழை முன்னெச்சரிக்கை நடவடிக்கையாக, தீயணைப்பு வீரர்களுக்கு, பேரிடர் மீட்பு பணியின்போது சிறப்பு நீச்சல் பயிற்சி தேவைப்படுகிறது. இதற்காக ராமநாதபுரம் கலெக்டர் அலுவலகம் அருகே உள்ள நீச்சல்குளத்தில் 25 தீயணைப்பு படையினருக்கு ஒரு வார நீச்சல் பயிற்சி வழங்கப்பட்டது. இதில் அடிப்படை முதல் உயர்நிலை வரையிலான நீச்சல் முறைகள் குறித்த பயிற்சி அளிக்கப்பட்டது. இறுதிநாளான நேற்று தொடர் மழைக்கு இடையே நீச்சல் பயிற்சி வழங்கப்பட்டது. இதன் மூலம் மழைக்காலத்தில் தீயணைப்பு வீரர்கள் திறம்பட செயல்பட முடியும் எனத் தீயணைப்புத் துறை அதிகாரிகள் தெரிவித்தனர்.