தொடர் மழையால் சாய்ந்த மரங்கள், வீடுகள் சேதம்

ராமநாதபுரம்: ராமநாதபுரம் நகராட்சி பகுதியில் தொடர்ந்து இருநாட்களாக பெய்த கனமழை காரணமாக, ராமேஸ்வரம் மெயின்ரோட்டில் மரம் சாய்ந்து விழுந்தது. பல்வேறு இடங்களில் தண்ணீர் குளம் போல் தேங்கியுள்ளதால் வாகன ஓட்டிகள், மக்கள் சிரமப்பட்டனர். ராமநாதபுரம் மாவட்டத்தில் கடந்த இருநாட்களாக தொடர்ந்து மழை பெய்து வருவதால் தாழ்வான பகுதிகளில் தண்ணீர் தேங்கியுள்ளன. பட்டணம்காத்தான் பகுதியில் உள்ள ரயில்வே சுரங்கப்பாதையில் 3 அடி வரை மழைநீர் தேங்கி காணப்பட்டது. இதனால் அப்பகுதியில் வாகன போக்குவரத்து பாதிக்கப்பட்டது. ராமநாதபுரம் கோட்டைமேடு, நொச்சியூரணி, லட்சுமிபுரம், அண்ணாநகர், பாரதி நகர், வைகை நகர், சக்கரக்கோட்டை, கிருஷ்ணாநகர் உள்ளிட்ட பகுதிகளில் ரோட்டில் ஆங்காங்கே மழைநீர் தேங்கி காணப்பட்டது. மேலும் வீடுகளை மழைநீர் சூழ்ந்தது. அக்ரஹாரம் ரோட்டில் உள்ள குறுகிய தெருக்களில் சமீபத்தில் புதிதாக ரோடு போடப்பட்டது. ரோட்டின் நடுவே உள்ள பள்ளத்தை முறையாக மூடவில்லை. இதனால் நடந்து செல்வோர், வாகன ஓட்டிகள் பள்ளத்தில் விழுந்தனர். ராமநாதபுரம் கலெக்டர் அலுவலகம் முகப்பு பகுதியில் மரம் சரிந்து ராமநாதபுரம்- -ராமேஸ்வரம் தேசிய நெடுஞ்சாலையில் சரிந்தது. இதனால் அப்பகுதியில் ஒரு மணி நேரத்திற்கு மேல் போக்குவரத்து பாதிக்கப்பட்டது. மண் அள்ளும் இயந்திரம் உதவியுடன் மரம் அகற்றப்பட்ட பின் போக்குவரத்து சீரானது.