கழிவுநீர் சுத்திகரிப்பு கட்டமைப்பு ஒன்றே தீர்வு

திருப்பூர்: ''எதிர்கால சந்ததியினருக்கு நல்ல வாழ்வியலை ஏற்படுத்தி கொடுக்க, நல்லாறு உள்ளிட்ட நீர்நிலைகளை மீட்டுருவாக்கம் செய்ய வேண்டும்'' என்கிறது, திருப்பூர் வேர்கள் அமைப்பு. இதன் ஒருங்கிணைப்பாளர் சந்தீப் கூறியதாவது: 'நல்லாறு' என்று உச்சரிக்கும் போது, 'நல்லா இரு' என்று வாழ்த்து மொழியாக உருவாக்கம் பெறுகிறது. நதிகள் என்பது மனித வாழ்வின் உயிர்நாடி. குடிநீர், விவசாயம், பல்லுயிர் பெருக்கம், சுற்றுச்சூழல் என, அனைத்துக்கும் ஆறுகள் அவசியமானவை. நொய்யல், நல்லாறு போன்ற ஆறுகள், தீவிர மாசுபாட்டில் சிக்கியுள்ளன. ஆறுகளில் சாக்கடை கழிவு கலப்பதால் அதன் இயற்கை மறுசுழற்சி தன்மை மறைந்து விடுகிறது. ஆறுகளில் பாயும் கழிவுநீரை சுத்திகரிக்க முடியாது; சுத்திகரித்து ஆற்றில் விட வேண்டும். சிற்றோடை, ஓடை அல்லது ஆற்றில் கலக்கும் வகையில் சாக்கடை கால்வாய் வடிவமைப்பு பணி இன்னும் தொடர்ந்து கொண்டுதான் இருக்கிறது. மாறாக, சிறிய அளவில் சுத்திகரிப்பு கட்டமைப்பை நிறுவி, அதன் பிறகு ஆற்றில் கலக்கலாம் என்ற சிந்தனை செயலாக மாறவே இல்லை. நதி மாசுபடுவதால், உயி ரியல் அமைப்பு மட்டும் பாதிக்கப்படுவதில்லை; குடிநீர், நிலம் மட்டுமல்ல; அடுத்த தலைமுறையின் ஆரோக்கியமும் பாதிக்கப்படுகிறது. நதி பாதுகாப்பு என்பது, சுற்றுச்சூழல் பாதுகாப்பு மட்டுமல்ல; மனிதர்களின் எதிர்காலத்துக்கான பாதுகாப்பு. மூளிக்குளத்துக்கு, சாயக்கழிவுநீர் வருவதை தடுத்தோம்; குப்பை கொட்டுவதை தடுத்தோம். மாவட்ட நிர்வாகம், மாநகராட்சியுடன் இணைந்து, வாய்க்காலில் மாநகராட்சி சாக்கடை கழிவு கழிப்பதை தடுக்க திட்டமிட்டோம். கழிவுநீர் கால் வாயை மாற்றி அமைக்கும் பணி, 70 சதவீதம் முடிந்துள்ளது; சில மாதங்களில், கழிவுநீர் கலக்காத குளமாக மூளிக்குளம் மாற்றப்படும். அதுபோலவே, நல் லாற்றையும் கழிவுநீரில் இருந்து மீட்டு, உயிர்த்தன்மையுள்ள ஆறாக மாற்ற முடியும். ரூ.5 கோடி வீணானது: நஞ்சராயன் குளம், எதிர்காலத்தில் பறவைகள் சரணாலயமாக மாறும்; நல்லாற்றில் வரும் கழிவுநீர் தேங்காமல், சுத்திகரிக்கப்பட்ட தண்ணீராக தேக்கலாம் என திட்டமிட்டனர். மொத்தம், ஐந்து கோடி ரூபாய் மதிப்பீட்டில், நல்லாற்று நீர், நஞ்சராயன் குளத்தில் கலக்கும் இடத்தில், பிரமாண்டமான சுத்திகரிப்பு நிலையம் கட்டப்பட்டது; முறையாக திறப்பு விழாவும் நடக்கவில்லை; பயன்பாட்டுக்கு வராமலேயே பாழாகிவிட்டது. 'நம் குப்பை; நம் பொறுப்பு' என்பது போல், நம் வீட்டு கழிவுநீர் நம் பொறுப்பு என்ற மாற்றம் உருவாக வேண்டும். தனித்தனி சுத்திகரிப்பு நிலையங்கள் அமைக்க வேண்டும்; சுத்திகரித்த பிறகே, சாக்கடை கழிவை, நீர்நிலைகளில் வெளியேற்ற வேண்டும். சுத்திகரிப்பு நிலைய இயக்கம், தொடர்ந்து கண்காணிக்கப்பட வேண்டும். - சந்தீப்: ஒருங்கிணைப்பாளர்: