பயிர் காப்பீடு அவகாசம் நீட்டிக்க வலியுறுத்தல்

சென்னை: 'பயிர் காப்பீடு செய்வதற்கான அவகாசத்தை வரும், 15ம் தேதி வரை நீட்டிக்க வேண்டும்' என, தமிழக விவசாயிகள் பாதுகாப்பு சங்கம் வலியுறுத்தி உள்ளது. அந்த சங்கத்தின் அறிக்கை: மத்திய அரசால் சமீபத்தில் வழங்கப்பட்ட, விவசாயிகளுக்கான அடையாள எண் இருந்தால் மட்டுமே, பயிர் காப்பீடு செய்ய முடியும் என்ற வகையில், தேசிய பயிர் காப்பீட்டு இணையதளம் வடிவமைக்கப்பட்டு உள்ளது. இதனால், பல மாவட்ட விவசாயிகளால் பயிர் காப்பீடு செய்ய இயலவில்லை. இதுவரை, 61 சதவீத விவசாயிகள் மட்டுமே, பயிர் காப்பீடு செய்துள்ளனர். தற்போது பயிர் காப்பீடு செய்ய, விவசாய அடையாள எண் கட்டாயமில்லை என, தமிழக அரசு விலக்கு பெற்றுள்ளது. பயிர் காப்பீடு செய்ய இன்று வரை அவகாசம் வழங்கப்பட்டு உள்ளது. 'டிட்வா' புயலால், பெரும்பாலான மாவட்டங்களில் மழை பெய்து வருகிறது. 2 லட்சம் ஏக்கருக்கு மேல், சம்பா, தாளடி நெல் பயிர்கள் நீரில் மூழ்கிஉள்ளன. உயிரிழப்பை குறைக்க, பொதுமக்கள் வெளியே செல்வதை தவிர்க்க வேண்டும் என, தமிழக அரசு மொபைல் போன்களுக்கு, குறுஞ்செய்தி அனுப்பி வருகிறது. பயிர் சாகுபடி சான்று கொடுக்க வேண்டிய வருவாய் துறையினர், பேரிடர் மேலாண்மை பணிகளை செய்து வருகின்றனர். மழை காரணமாக, 'இ - சேவை' மையங்களில் இணையதளங்கள் முடங்கி உள்ளன. எனவே, பயிர் காப்பீட்டிற்கான காலக்கெடுவை வரும், 15ம் தேதி வரை நீட்டிக்க வேண்டும். இதற்கான அனுமதியை, வேளாண்துறை அமைச்சர் மற்றும் அதிகாரிகள் பெற்றுத் தர நடவடிக்கை எடுக்க வேண்டும். இவ்வாறு அறிக்கையில் கூறப்பட்டுள்ளது.