வங்கதேசத்தில் சக்திவாய்ந்த நிலநடுக்கம்; வட மாநிலங்களில் நில அதிர்வு

டாக்கா: வங்கதேசத்தில் இன்று(நவ.,21) சக்திவாய்ந்த நிலநடுக்கம் ஏற்பட்டது. ரிக்டர் அளவில் 5.7 ஆக பதிவாகி உள்ளது. இதனால் கோல்கட்டா உள்ளிட்ட வடகிழக்கு மாநிலங்களில் நில அதிர்வு உணரப்பட்டது.வங்கதேசத்தில் இன்று (நவ.,21) காலை 10.08 மணிக்கு சக்திவாய்ந்த நிலநடுக்கம் ஏற்பட்டது. இது ரிக்டர் அளவில் 5.7 ஆக பதிவாகி உள்ளது. இது புவியின் மேற்பரப்பில் இருந்து 10 கி.மீ ஆழத்தில் ஏற்பட்டது. டாக்காவில் நடந்த, வங்கதேசம், அயர்லாந்து இடையிலான கிரிக்கெட் போட்டி சிறிது நேரம் பாதிக்கப்பட்டது.இந்த நிலநடுக்கத்தின் தாக்கம் வட கிழக்கு இந்தியாவின் பல்வேறு பகுதிகளில் எதிரொலித்தது.கோல்கட்டா உள்ளிட்ட வட கிழக்கு மாநிலங்களில் வசிக்கும் மக்கள் நில அதிர்வால் கட்டடங்கள் குலுங்குவதையும், மின் விசிறிகள் அசைவதையும் வீடியோவாக சமூக வலைதளத்தில் பதிவிட்டனர்.இந்த நிலநடுக்கத்தால் ஏற்பட்ட சேதம் குறித்து எந்த தகவலும் இதுவரை வெளியாகவில்லை.