கோட்டைக் கருப்பர் (காக்கும் தெய்வமே மெட்டு)
கோட்டைக் கருப்பரே - எங்கள்
கோட்டைக் கருப்பரே - எமக்கு
கொள்ளை இன்பத்தை -நாளும்
கொண்டு தருவாயே! (கோட்டை)
திருப்புத்தூரையே - காக்கும்
திவ்ய கருப்பணே - உன்னைத்
தினமும் போற்றினோம் - மனதில்
திடத்தை தருவாயே (கோட்டை)
கோட்டை மத்தியில் - நாளும்
கொலு இருப்பவனே - என்றும்
சாட்டை சொடுக்கியே - நீயும்
சடுதி வருவாயே! (கோட்டை)
கருப்பு வேஷ்டியும் - நல்ல
சிவப்புபட்டுமே - உனைக்
காண்பவர் மனதை - நாளும்
கவர்ந்து இழுக்குதே! (கோட்டை)
முறுக்கு மீசையில் - நாளும்
முறுவல் செய்வாயே - உளம்
உருகிப் பாடுவோம் - எம்மை
உயர வைப்பாயே (கோட்டை)
கயவர் செயல்களை - நாளும்
களை எடுக்கவே - கையில்
பிரம்பைக்கொண்டாயே - எங்கள்
பிதற்றம் தீர்ப்பாயே! (கோட்டை)
சின்னக் கருப்பரை - உந்தன்
சிரத்தில் கொண்டாயே! - அழகு
முத்துக் கருப்பரை - எமக்கு
சொத்தாய் தந்தாயே! (கோட்டை)
தலைப் பாகையை - நாளும்
தாங்கி நிற்பாயே! - நீயும்
வேட்டைத் தலைப்பாகை - தினமும்
விரும்பி வைப்பாயே! (கோட்டை)
பாவம் போக்கிட - நீயும்
பறந்து வந்திட - இரு
பரிகள் இரண்டுமே - உடன்
பகட்டாய் நிற்குதே! (கோட்டை)
பார்க்கும் விழியிலே -பாவம்
பறந்து ஓடுமே - நீயும்
தேருக்குள் வந்து - எம்மை
தினமும் காப்பாயே! (கோட்டை)