குடியரசு தினம்!
போராட்டம் மற்றும் உயிர் தியாகங்கள் மூலம், ஆங்கிலேயரை பணிய வைத்து, ஆகஸ்ட் 15, 1947ல், சுதந்திரம் பெற்றனர், நம் தலைவர்கள். அதன் நினைவாக, சுதந்திர தினம் கொண்டாடப்படுகிறது. அதுபோல், ஜனவரி 26ல் குடியரசு தினம் கொண்டாடப்படுகிறது. இதற்கான காரணத்தை தெரிந்து கொள்வோம்...குடியரசு என்றால், 'மக்களாட்சி' என்று பொருள். சுதந்திரத்துக்காக பாடுபட்ட பல அமைப்புகள் இணைந்து, ஜனவரி 1930-ல் பாகிஸ்தான் பகுதியில் உள்ள லாகூரில் மாநாடு நடத்தின. மூவர்ண தேசியக்கொடியை ஏற்றினார் ஜவஹர்லால் நேரு. காந்தியடிகள் தலைமை தாங்கினார். அதில், 'பூர்ண சுவராஜ்' பெறுவதற்கான தீர்மானம் நிறைவேற்றப் பட்டது. இதன் பொருள், முழுமையான சுதந்திரம் பெறுவதே நோக்கம் என்பதாகும். அதை செயல்படுத்தும் விதமாக, ஒரு வேண்டுகோள் விடுத்தார் காந்தியடிகள். அதில், ஆண்டு தோறும், ஜனவரி 26ம் நாளை சுதந்திர தினமாக கடைபிடித்து, ஆங்கிலேயருக்கு எதிர்ப்பு தெரிவிக்க கேட்டுக் கொண்டார்; அதன்படியே கடைபிடிக்கப்பட்டது.முறையான சுதந்திரம், 1947ல் பெற்றபின், டாக்டர் அம்பேத்கர் தலைமையில் அமைக்கப்பட்ட குழு, இந்திய அரசியல் அமைப்பு சட்ட வரைவை உருவாக்கியது. ஜவஹர்லால் நேருவை பிரதமராக கொண்ட முதல் நாடாளுமன்றம், இந்த வரைவு குறித்து, இரண்டு ஆண்டுகள் விவாதம் நடத்தியது. இறுதியாக, ஜனவரி 24, 1950ல் அரசியல் அமைப்பு சட்ட வரைவு, திருத்தங்களுடன் ஏற்கப்பட்டது.ஆங்கிலம் மற்றும் ஹிந்தி மொழிகளில் கையால் எழுதிய அரசியல் அமைப்பு சட்டப் புத்தகம் உருவாக்கப்பட்டது. அது, அதிகாரப்பூர்வமாக ஏற்கப்பட்டது. இதை, மக்களாட்சி மலர்ந்த நாளாக கொண்டாட முடிவு செய்தார் நேரு. ஏற்கனவே, காந்தியடிகள் சுதந்திர தினமாக அறிவித்திருந்த, ஜனவரி 26-ம் நாளையே, மக்களாட்சி மலர்ந்த நாளாக, அதாவது குடியரசு தினமாக அறிவித்தார். அதை கொண்டாடுவதற்கு உரிய நடைமுறையும் உருவாக்கப்பட்டது. அந்த முறைப்படி குடியரசு தினத்தன்று...* சுதந்திரத்துக்காக உயிர் தியாகம் செய்தவர்களுக்கு, புதுடில்லி இந்தியா கேட் நினைவிடத்தில் பிரதமர் அஞ்சலி செலுத்த வேண்டும்* சிறப்பு விருந்தினருடன் முப்படை அணிவகுப்பை ஏற்று, சிறப்பாக செயல்பட்ட வீரர்களுக்கு பதக்கம் வழங்கி கவுரவிக்க வேண்டும்* அயல்நாட்டு சிறப்பு விருந்தினர் ஒருவரை விழாவில் பங்கேற்க செய்ய வேண்டும். அதன்படி, முதல் குடியரசு தின விழாவில், தென்கிழக்கு ஆசிய நாடான இந்தோனேஷிய அதிபராக இருந்த சுகர்னோ பங்கேற்றார்.இந்த அடிப்படையில் தான், இன்றும் குடியரசு தினவிழா கொண்டாடப்படுகிறது.இந்திய சட்ட நடைமுறைகளை முறையாக கடைபிடித்து, மக்களாட்சியை வலுவாக்குவோம்.