உள்ளூர் செய்திகள்

உலகம் சுற்றும் வாலிபன்

விமான நிலைய பாதையை தவற விட்ட டிரைவர் ஹியோட்டோ, பின், வண்டியை வேகமாக செலுத்தியதால், குறிப்பிட்ட நேரத்திற்குள், விமான நிலையத்தை அடைந்து விட்டோம். ஹியோட்டோவின் முகத்தில் அளவுகடந்த மகிழ்ச்சி; அவர் எனக்கும், மற்ற நண்பர்களுக்கும் மலர் செண்டுகள் கொடுத்தார். நானும், என் நினைவாக ஒரு சில பொருட்களைக் கொடுத்தேன்.விமானத்திற்கு புறப்படுவதற்கு முன், அவரை மார்போடு சேர்த்து அணைத்துக் கொண்டேன். என் கண்களில் நீர் ததும்பியது; அணைப்பிலிருந்து விடுபட்ட போது, அவருடைய கண்ணிலிருந்தும் கண்ணீர் வழிவதைக் கண்டேன். சில நாட்கள் மட்டுமே பழகிய இருவருக்கிடையில், மொழி, இன வேறுபாடுகளை கடந்து, அன்புறவு ஏற்படு வதையும், பல ஆண்டுகள் பழகியும், உள்ளம் ஒட்டாமல் அன்னியராகவே வாழ்கின்றவர்களையும் சிந்தித்த போது, மனித மனத்தின் விசித்திரத்தை எண்ணி வியக்காமல் இருக்க முடியவில்லை.மதியம், 2:10 மணிக்கு, விமானம் புறப்பட்டு, மணி, 5:30க்கு ஹாங்காங் வந்து சேர்ந்தது. எங்கு பார்த்தாலும் தண்ணீர்! கரையைக் காண முடியவில்லை. 'நிலம் எங்கே இருக்கிறது... விமானம் எங்கே இறங்குகிறது...' என்று, நாங்கள் ஒருவரையொருவர் கேட்டுக் கொண்டோம்.இரு பக்கத்திலும் தண்ணீர், இடையில் நிலம்; அந்த நிலப்பகுதியில்தான், விமானம் இறங்கியது.விமான ஓட்டிகள் மிகச் சிறிய தவறிழைத்து விட்டாலும், தண்ணீருக்குள் விமானம் இறங்கி விடும். முன்பு ஒருமுறை, தரை இறங்க வேண்டிய விமானம் மூடுபனியால், தண்ணீரில் இறங்கி விட்டதாகக் கூடச் சொன்னார்கள். நாங்கள் பயணம் செய்த விமானம், பத்திரமாகத் தரை இறங்கியது.ஹாங்காங் விமான நிலையத்தில் பல தமிழ் நண்பர்கள் அகமும், முகமும் மலர எங்களை வரவேற்றனர். அவர்களில் பெரும்பாலானோர் முஸ்லிம்கள்.சென்னையில் அறிமுகமான ரஹ்மானும், அவர் தம் குடும்பத்தினரும், நண்பர் விஸ்வநாதனும் எங்களை வரவேற்றனர். இருவரும் எங்களை தங்கள் கார்களில், 'கவ்லூன்' என்ற பகுதிக்கு அழைத்துச் சென்றனர். வழியில், கார்களைப் படகுகளில் ஏற்றி, எதிர் கரையில் உள்ள ஹாங்காங்கிற்கு சென்றோம்.பெத்ரீ என்றழைக்கப்படும் இயந்திரப் படகில், நாங்கள் சென்ற கார்களோடு, மேலும், பல கார்கள், டிரக்குகள் போன்றவைகளும் பயணம் செய்தன. தமிழகத்தில் ஒரு பழமொழி உண்டு... 'ஓடம் வண்டியில் ஏறும்; வண்டி ஓடத்திலும் ஏறும்...' என்று. இதை முன்பு நான் நேரில் கண்டிருந்தாலும், இன்று, அது எத்தனைத் தத்துவங்களை உள்ளடக்கிய சொல் என்பதை, நன்கு உணர முடிந்தது.இரவு ஓட்டலில் உணவு உட்கொண்டோம். தூங்கச் செல்வதற்கு முன், மின் ஒளியில் அதன் அழகை பார்ப்பதற்கு வசதியாக, ஒரு குன்று இருக்கிறது என்று கூறினர். அந்த இடத்திற்குச் சென்று பார்த்தோம். நாங்கள் நின்றிருந்த இடத்தில், மிகக் கொஞ்சமாக வெளிச்சம் இருந்தது. பிறை சந்திரன் வடிவத்தில் தண்ணீர் பகுதியும், அதன் கரையில் பல்வேறு வண்ண விளக்குகளின் அழகொளி, எங்களை கவர்ந்து, மெய்மறந்து பார்த்துக் கொண்டே இருக்கச் செய்தது.மறுநாள், படப்பிடிப்பிற்காக வேறு இடங்களைப் தேர்ந்தெடுக்கச் சென்றோம். ஓர் இடத்தில் படிகளில் இறங்கி நடந்த போது, கூட்ட நெரிசலில் இருந்து, 'அய்யா...' என்றொரு சத்தம், 'மிஸ்டர்...' என்று, இன்னொரு சத்தம் கேட்டு, திரும்பினேன். காலில் ஒரு சிறு கட்டுப் போட்டுக் கொண்டிருந்த ஒருவர், கையை நீட்டி பிச்சை கேட்டார். இந்தியாவிலிருந்து, 5ம் தேதி புறப்பட்டதற்குப் பின், அன்று, 25ம் தேதியன்று தான், முதன் முதலாக ஒரு பிச்சைக்காரரைச் சந்தித்தேன்.பசி வந்தால், பத்தும் பறந்து போகும் என்பர். பசிக்காக சிலர் பிச்சை எடுக்கின்றனர் என்றால் மற்றும் சிலர், வறுமையின் கொடுமையால், பிச்சை எடுக்கின்றனர்.ஜப்பானில், நான் பார்த்த வரை, பிச்சைக்காரர்கள் தென்படவில்லை. பிச்சை எடுப்பதை, அவர்கள் கேவலமாக கருதுகின்றனர் போலும்.ஹாங்காங் நகரத்தின் அழகையும், செல்வச் செழிப்பையும் கண்டு, மதி மயங்கும் ஒவ்வொருவரும், நான் மேலே குறிப்பிட்ட இதையும் காணத்தான் வேண்டும்.செஞ்சீனாவின் விடுதலை விழாவை, ஹாங்காங்கில் உள்ள சீனர்களில் பெரும் பாலானோர் மகிழ்ச்சியோடு கொண்டாடினர்.எந்தப் பக்கம் பார்த்தாலும், எளிமை நிறைந்த சிறு கடைகள், சிறு படகுகள், வீதியை ஒட்டிப் பக்கத்திலிருந்த நதியில் மிதந்து கொண்டிருந்தன. அதன் முகப்பில், செங்கொடி பறந்து கொண்டிருந்தது.'எல்லாப் படகுகளிலும், செங்கொடிகள் பறக்கின்றனவே... எல்லாரும் செஞ்சீனாவின் ஆதரவாளர்களா?' என்றேன் நண்பர் ஒருவரிடம்.அதற்கு அவர் அளித்த பதில், எனக்குத் திகைப்பை தந்தது.'சீனக் கடற்கரையோரத்தில், மீன் பிடிக்க வேண்டுமாயின், சீனாவின் அனுமதி வேண்டும். இக்கொடிகளோடு சென்றால், எளிதாக அனுமதி பெறலாம். அதனால் தான் இப்படி...' என்றார். ஆனால், அவருடைய கூற்று தவறானது என்பது, பின்பு புரிந்தது.காரணம், மீன் பிடிக்க வேண்டுமே என்பதற்காக, படகுக்காரர்கள், செங்கொடிகளைத் தங்களது படகுகளில் கட்டியிருந்தார்களாயின், ஹாங்காங் நகரத்திற்குள் சினிமாக் கொட்டகைகளிலும், வீடுகளிலும், கடைகளிலும் அலங்கார விளக்குகளோடு, மாசேதுங்கின் சித்திரங்களைப் பெரிய பேனர்களாக அமைத்திருக்க மாட்டார்கள்.இது போன்று தான், நாம் போடுகின்ற தப்புக் கணக்குகள், உண்மையைப் பொய்யாக்கிக் கூறுவதன் வாயிலாக, நம் மனதை வேறு வழியில் திருப்திப்படுத்திக் கொள்ள முயலுகின்றன.ஹாங்காங்கின், அழகிய கடற்கரைகளில் ஒன்றான, 'பெல்ஸ் பீச்'சில், 'நிலவு ஒரு பெண்ணாக...' என்ற பாடல், படமாக்கப்பட்டது.'கபர்டீன்' என்றழைக்கப்படும் அப்பகுதியில், நானும், மஞ்சுளாவும் அசோகனிடமிருந்து தப்பி தெருவில் ஓடிவரும் காட்சியும் படமாக்கப்பட்டது.ஹாங்காங்கில், 'பிரின்ஸஸ் பில்டிங்க்ஸ்' என்ற, ஒரு வியாபாரத் தலம் உண்டு. எதிர் வரிசையிலுள்ள இக்கட்டத்திலிருந்து தொடர்ந்து மேலே சென்றால், இக்கடையின் மறு பகுதிக்குச் செல்ல, வீதியின் குறுக்கே தெருப்பாலம் அமைக்கப்பட்டிருந்தது. அது, அந்தக் கடைக்குச் சொந்தமானது.அந்தப் பாலம், இரு பக்கமும் கண்ணாடிகளால் தடுக்கப்பட்டு, மிக அழகாக இருந்தது. அந்த இடத்தில், நானும் மஞ்சுளாவும் சந்தித்து உரையாடும் காட்சியைப் படமாக்கினேன். நாங்கள் அங்கு சென்றதும், அங்குள்ள தமிழன்பர்களும், இந்தியர்களும் எனக்கும் குழுவினர்களுக்கும் இரவு, 'ஹில்டன்' ஓட்டலில், விருந்து கொடுத்தனர்.'டைகர்பாம்' என்பது, ஒரு மருந்து, அதை விற்றுச் சம்பாதித்த பணத்திலிருந்து, பல லட்ச ரூபாய் செலவு செய்து, 'டைகர் பாம் கார்டன்' என்ற தோட்டத்தை, அதன் உரிமையாளர் தோற்றுவித்திருப்பதாகக் கூறினர். அந்த இடத்தில், ஒரு பாடல் காட்சியைப் படமாக்கினேன்.ஹாங்காங்கில் மட்டும் அல்ல; சிங்கப்பூரிலும், இதைப் போன்ற, டைகர்பாம் கார்டனை வேறு மாதிரியாக அமைத்திருக்கின்றனர். குழந்தைகளுக்கு, நல்லதொரு பொழுதுபோக்கு இடமாக இது உள்ளது.அங்கு, இந்தியாவைச் சேர்ந்த மிகப் பெரிய கோடீஸ்வரரான, ஹரிலீலா என்பவர், தங்களது வீட்டிலேயே, படம் எடுக்க அனுமதித்ததுடன், 'தங்கத் தோணியிலே...' என்ற பாடலை, அவருடைய விசேஷ இயந்திர படகில், படமாக்க அனுமதித்தார்.இவ்வாறு, நண்பர்களின் அன்பு, அரவணைப்பில், செல்லக் குழந்தைகளாக்கப்பட்டு, சிறப்போடு பாதுகாக்கப்பட்டோம். எங்கள் படத்தொழிலுக்கு அவர்கள் செய்த உதவி மறக்க முடியாதது.மனிதனாக, இவ்வுலகில் ஒருமுறைதான் பிறக்கிறோம்; இறைவன் படைத்த உலகை முழுவதுமாகப் பார்த்து ரசிப்பது என்பது, எல்லாருக்கும் இயலாத காரியம்.உலகத்தைச் சுற்றிப் பார்க்க எனக்குக் கிடைத்த, இந்த வாய்ப்பை, இறைவன் கொடுத்த நல்ல வாய்ப்பாகவே கருதுகிறேன். அதை முழுமையாகப் பயன்படுத்தி, இந்தப் படத்தை உருவாக்கியிருப்பதாக நினைக்கிறேன்.தமிழகத்தில், ஒரு குக்கிராமத்தில் இருக்கும் ரசிகனும் ஜப்பான், ஹாங்காங், டோக்கியா, சிங்கப்பூர் போன்ற நாடுகளைப் பார்த்த உணர்வை, இந்த படத்தின் மூலம் பெறுவான் என்றால், அதுவே, 'உலகம் சுற்றும் வாலிபன்' படத்தின் வெற்றி என்று சொல்வேன்! — முற்றும் -தொகுப்பு: வைரஜாதன்,நன்றி 'பொம்மை' விஜயா பப்ளிகேஷன்ஸ்,சென்னை.- எம்.ஜி.ஆர்.,


தினமலர் சேனல்களுக்கு SUBSCRIBE செய்யுங்கள் !