உள்ளூர் செய்திகள்

ஒற்றுமையாய் இருங்கள்!

செப்., 13 - ஓணம்தம்பதியின் ஒற்றுமையை வலியுறுத்த, வாமனனாக அவதரித்தார், பகவான் விஷ்ணு. மகாபலி சக்கரவர்த்தியின் கர்வத்தை அடக்க அல்லவா அவர் தோன்றினார் என்று நீங்கள் எண்ணக்கூடும்; அது ஒரு காரணம் மட்டுமே! ஆனால், அவதாரத்தின் நோக்கம், தம்பதியின் ஒற்றுமையை வலியுறுத்தவே!தேவர்களை அடக்கி, ஒடுக்கி வைத்தான், அசுர வேந்தனான மகாபலி சக்கரவர்த்தி. இதனால், கோபமடைந்த தேவர்கள், அவனைக் கொன்று விட்டனர். இறந்தவரை பிழைக்க வைக்கும் ம்ருத சஞ்சீவினி மந்திரத்தை கற்று வைத்திருந்தார், அசுர குருவான சுக்ராச்சாரியார். இம்மந்திரத்தைக் கற்பது கடினம்; பத்தாயிரம் கோடி முறை, மூச்சு விடாமல் மனம் ஒன்றி, யார் இதை விடாமல் சொல்கிறாரோ, அவருக்கே இது சித்திக்கும்.மகாபலி உட்பட, மடிந்து போன அசுர குலத்தினரை உயிர் பிழைக்க வைத்த சுக்ராச்சாரியார், தேவர்களின் சொத்துகள் எல்லாம் மகாபலியின் வசம் வரச் செய்தார்.இதனால், மிகவும் கவலையடைந்த தேவர்களின் தாயான அதிதி, தங்கள் குருநாதரான பிரகஸ்பதியிடம் (வியாழ பகவான்) ஆலோசனை கேட்டாள்.'மகாபலி தர்மவான்; அவனுக்கு, பிராமணர்களின் ஆசிர்வாதம் நிறைய இருக்கிறது. அதனாலயே அவன் பலம் பெற்று விளங்குகிறான். எப்போது, அவனால், ஒரு பிராமணனுக்கு கொடுத்த வாக்கை நிறைவேற்ற முடியாத சூழல் ஏற்படுகிறதோ, அப்போது அவன் பலமிழப்பான்; அவனை ஒடுக்கி விடலாம்...' என்றார்.உடனே, யஜ்ஞேச யஜ்ஞ புருஷாச்யுத தீர்த்த பாததீர்த்த ச்ரவ: ச்ரவண மங்கள நாமதேயா என்ற ஸ்லோகம் சொல்லி, விஷ்ணுவை வணங்கினாள், அதிதி.இந்த ஸ்லோகத்திற்கு பொருள்: யாகங்களால் பூஜிக்கப்படும் விஷ்ணுவே... யாகம் செய்து எதைக் கேட்டாலும் தருபவன், குளிர்ந்த திருவடியை உடையவன், மங்கலமான பெயர்களைக் கொண்டவன்!இந்த ஸ்லோகத்தையோ அல்லது அதன் பொருளையோ பெண்கள் சொன்னால், அவர்களது குழந்தைகள் பாசமாகவும், புத்திசாலித்தனமாகவும் இருப்பர். தினமும் விடாமல் சொன்னால், குடும்ப பிரச்னைகள் முழுமையாக தீர்ந்து போகும். இதைத் தினமும் சொன்ன அதிதி, துவிதியையில் ஆரம்பித்து, ஏகாதசி திதி வரை, 10 நாட்கள், 'பயோ' என்ற மகப்பேறு விரதத்தை அனுஷ்டித்தாள். இதன் பலனாக, அதிதிக்கு காட்சி தந்த விஷ்ணு, ஆவணி மாதம் துவிதியை திதியும், திருவோணம் நட்சத்திரமும் கூடிய நன்னாளில், அவள் வயிற்றில் பிறப்பதாய் வாக்களித்தார்; அதன்படி வாமனராக பிறந்து மகாபலியிடம் மூன்றடி நிலம் கேட்டு, அவனை ஆட்கொண்டார்.அதிதியின் கணவர் கஷ்யப மகரிஷி; இவர்கள் ஆரம்பத்தில் ப்ருச்னி - சுதபஸ் என்ற பெயரில் பிறந்து, தம்பதியாயினர். அவர்களுக்கு ப்ருச்னி கர்பன் என்ற பெயரில் பிறந்தார், விஷ்ணு. அதற்கு அடுத்த பிறவியில், இத்தம்பதி, கஷ்யபர் - அதிதி என்ற பெயரில் பிறக்க, இவர்களுக்கு வாமனராக தோன்றினார், விஷ்ணு.தொடர்ந்து வந்த பிறவியில் வசுதேவர் - தேவகியாகப் பிறந்து, கிருஷ்ணனை பிள்ளையாக பெற்றனர். அன்பான தம்பதி, எத்தனை ஜென்மம் எடுத்தாலும் பிரிவதில்லை; அவர்கள், ஒரே நேரத்தில் பகவானின் திருவடியை அடைந்து, சொர்க்கவாசம் அனுபவிப்பர் என்கிறது சாஸ்திரம்.வாமனரின் சரித்திரம் கேட்ட தம்பதியர், மனமொத்து வாழ உறுதியெடுங்கள்!தி.செல்லப்பா


தினமலர் சேனல்களுக்கு SUBSCRIBE செய்யுங்கள் !