ஸ்டார்ட் அப் தரவரிசையில் முதலிடம் பெற்றது தமிழகம்

சென்னை: நாட்டில், 'ஸ்டார்ட் அப்' எனப்படும், புத்தொழில் நிறுவனங்களுக்கு சிறந்த சூழல் அமைப்பை ஏற்படுத்தும் மாநிலங்களுக்கான தர வரிசை பட்டியலில் தமிழகம், 'பெஸ்ட் பெர்பார்மர்' எனப்படும் முதலிடத்தை பெற்றுள்ளது.இந்த விருதை நேற்று டில்லியில், மத்திய அமைச்சர் பியுஷ் கோயலிடம், தமிழக அரசின் ஸ்டார்ட் அப் டி.என்., தலைமை செயல் அதிகாரி சிவராஜா ராமநாதன் பெற்றார்.மத்திய அரசின், 'ஸ்டார்ட் அப் இந்தியா' நாட்டில் புத்தொழில் நிறுவனங்களுக்கான சிறந்த சூழலை கட்டமைத்த மாநிலங்களுக்கான, 2022 தர வரிசை பட்டியலை, நேற்று டில்லியில் பாரத் மண்டபத்தில் நடந்த நிகழ்ச்சியில் வெளியிட்டது.அதில் தமிழகம், முதல் தர வரிசை இடமான, 'பெஸ்ட் பெர்பார்மர்' பிரிவில், மாநிலத்தில் சிறப்பான புத்தொழில் செயல்பாடுகளை மேற்கொண்டதற்காக விருது பெற்றது.இந்த விருதை, மத்திய தொழில் மற்றும் வர்த்தக துறை அமைச்சர் பியுஷ் கோயல் வழங்க, தமிழக அரசின் ஸ்டார்ட் அப் டி.என்., தலைமை செயல் அதிகாரி சிவராஜா ராமநாதன் பெற்றார்.கடந்த, 2021 தர வரிசை பட்டியலில் மூன்றாம் இடமான, 'லீடர்' இடத்தை பிடித்த தமிழகம், தற்போது, புத்தொழில் சூழல் அமைப்பில் சிறப்பாக செயல்படும் மாநிலம் என்று முதல் தரவரிசை இடத்தை பிடித்துள்ளது.புத்தொழில் நிறுவனங்களுக்கு ஆதரவு, நிதி உதவி, திறன் மேம்பாடு அளித்தல் செயல்பாடுகளில் 100 சதவீத புள்ளிகளையும்; தொழில் வளர் காப்பகங்களுக்கு ஆதரவு அளித்தல், தொழில்முனைவோருக்கு வழிகாட்டுதல் வழங்குதலில் 94 சதவீத புள்ளிகளையும்; நிலையான எதிர்கால வளர்ச்சியை ஊக்குவிக்கும் விதமான செயல்பாடுகளுக்கு 75 சதவீத புள்ளிகளையும் தமிழகம் பெற்றுள்ளது.மேலும், ஸ்டார்ட் அப் இந்தியாவின், 2023ம் ஆண்டிற்கான தேசிய புத்தொழில் விருதுகள் போட்டியில், நிலைத்த வளர்ச்சிக்கான முன்னோடி புத்தொழில் நிறுவனங்கள் பிரிவில் வெற்றி பெற்ற தமிழகத்தைச் சேர்ந்த, 'கிரீன் வைரோ குளோபல்' நிறுவனத்திற்கு பாராட்டு சான்று வழங்கப்பட்டது.இந்நிறுவனம், தமிழக அரசின் புத்தொழில் ஆதார நிதி திட்டத்தின் கீழ் பயன்பெற்றது.தமிழகத்தைச் சேர்ந்த 'அட்சுயா டெக்னாலஜிஸ்' நிறுவனம், புத்தாக்க பிரிவில் வெற்றி பெற்றதற்கான சான்றிதழ் பெற்றது.

பிற மாநிலங்கள்

தேசிய அளவில் தமிழகம் தவிர, 'பெஸ்ட் பெர்பார்மர்ஸ்' விருதை கேரளா, கர்நாடகா, குஜராத், ஹிமாச்சல பிரதேசம் ஆகிய மாநிலங்கள் பெற்றுள்ளன. 'டாப் பெர்பார்மர்ஸ்' வரிசையில் மஹாராஷ்டிரா, ஒடிசா, பஞ்சாப், ராஜஸ்தான், தெலுங்கானா, அருணாச்சல பிரதேசம், மேகாலயா ஆகிய மாநிலங்கள் இடம்பெற்றுள்ளன.