ராகுலை விமர்சித்து வீடியோ வெளியீடு: நட்டா மீது வழக்குப்பதிவு

புதுடில்லி: காங்., எம்.பி., ராகுலை விமர்சித்து வீடியோ வெளியிட்டதாக கூறி, பா.ஜ., தேசிய தலைவர் நட்டா, கர்நாடகா மாநில பா.ஜ., தலைவர் விஜயேந்திரா, பா.ஜ.,வின் தகவல் தொழில்நுட்ப பிரிவு முக்கிய பிரமுகர் அமித் மாளவியா ஆகியோர் மீது பெங்களூரு போலீசார் வழக்குப்பதிவு செய்துள்ளனர். லோக்சபா தேர்தல் பிரசாரத்தில் இஸ்லாமியர்களுக்கு ஆதரவாக காங்கிரஸ் செயல்பட்டு வருகிறது என பா.ஜ., தலைவர்கள் விமர்சனம் செய்து வருகின்றனர். கடந்த வாரம் கர்நாடக பா.ஜ., எக்ஸ் சமூகவலைதளத்தில் ராகுல், முதல்வர் சித்தராமையா ஆகியோரை விமர்சித்து வீடியோ ஒன்று வெளியிட்டு இருந்தது.அந்த வீடியோவில், ராகுல், சித்தராமையா இஸ்லாமியர்களுக்கு அதிக நிதி ஒதுக்குவது போலவும், அவர்கள் வளர்ந்து வந்து மற்றவர்களின் இட ஒதுக்கீட்டை பறிப்பதாகவும் சித்தரிக்கப்பட்டு இருந்தது. இது தொடர்பாக, பா.ஜ., மீது தேர்தல் கமிஷனில் காங்கிரஸ் புகார் அளித்திருந்தது. இந்நிலையில், பா.ஜ., தேசிய தலைவர் நட்டா, கர்நாடகா மாநில பா.ஜ., தலைவர் விஜயேந்திரா, பா.ஜ.,வின் தகவல் தொழில்நுட்ப பிரிவு முக்கிய பிரமுகர் அமித் மாளவியா ஆகியோர் மீது பெங்களூரு போலீசார் வழக்குப்பதிவு செய்துள்ளனர்.