தர்மமே வெல்லும்; அது தான் கடவுளின் விருப்பம்: துணை ஜனாதிபதி சிபிஆர் பேச்சு

குருஷேத்திரா: ''அதர்மத்தை தர்மம் என்றுமே வெற்றி கொள்ளும். அது தான் கடவுளின் விருப்பம். அந்த வகையில் நீதி நிலை நாட்டப்பட்ட தலம் குருஷேத்திரம்,'' என்று, குருஷே த்திரத்தில் நடந்த விழாவில் துணை ஜனாதிபதி சி.பி.ராதாகிருஷ்ணன் பேசினார்.ஹரியானா மாநிலம் குருஷேத்திரத்தில், அகில பாரதிய தேவஸ்தானம் சம்மேளன நிகழ்ச்சியை தொடங்கி வைத்து துணை ஜனாதிபதி சி.பி.ராதாகிருஷ்ணன் பேசியதாவது:குருஷேத்திரம் என்பது அதர்மத்துக்கு எதிரான தர்மத்தின் வெற்றிக்கு சாட்சியாக இருக்கிறது. அது தான் குருஷேத்திரத்தின் சிறப்பு.குருஷேத்திரப்போர் நடந்தபோது, பீஷ்மர், துரோணச்சார்யார், கர்ணன், துரியோதனன், அவரது 100 சகோதரர்கள், இன்னும் பலர் என ஒரு பக்கம் இருந்தனர். அவர்களை எதிர்த்து வெறும் 5 பேர் மட்டுமே இருந்தனர். இருந்தும் தர்மமே வென்றது. அதர்மத்தை தர்மம் என்றுமே வெற்றி கொள்ளும். அது தான் கடவுளின் விருப்பம். அந்த வகையில் நீதி நிலை நாட்டப்பட்ட தலம் குருஷேத்திரம்.தர்மத்தின் சக்தியை பாருங்கள். குருஷேத்திரப்போர் நடந்தபோது, போருக்கு முன்னதாக, பகவான் ஸ்ரீ கிருஷ்ணர், அர்ஜூனருக்கு அருளியது தான் பகவத் கீதை. இன்றும் அது பொருத்தமானதாகத்தான் இருந்து கொண்டிருக்கிறது. இவ்வாறு துணை ஜனாதிபதி பேசினார்.நிகழ்ச்சியில், ஹரியானா மாநில முதல்வர் நயாப் சிங் சைனி உள்ளிட்டோர் பேசினர்.