ரேபரேலியில் பிரியங்காவை எதிர்த்து வருண் போட்டியா ?

புதுடில்லி: உ.பி., மாநிலம் ரேபரேலி லோக்சபா தொகுதியில் பிரியங்காவை எதிர்த்து பா.ஜ.,சார்பில் வருண் களம் இறக்கப்பட உள்ளதாக தகவல்கள் வெளியாகியுள்ளன. ஏழு கட்டங்களாக நடைபெற உள்ள லோக்சபா தேர்தலில் முதற்கட்ட தேர்தல் கடந்த 19-ம் தேதி 21 மாநிலங்களில் 102 தொகுதிகளுக்கு நடந்து முடிந்தது. நாளை (ஏப்.26) 13 மாநிலங்களில் 89 தொகுதிகளுக்கு இரண்டாம் கட்ட தேர்தல் நடக்கிறது.இந்நிலையில் உ.பி. மாநிலம் ரேபரேலி லோக்சபா தொகுதி தற்போதைய எம்.பி.யான சோனியா, திடீரென ராஜ்யசபா எம்.பி.,ஆனார். இதையடுத்து இத்தொகுதியில் காங்., வேட்பாளர் யார் என்பது குறித்து இதுவரை ரகசியம் காக்கப்பட்டு வருகிறது. தவிர ராகுல் தொகுதியாக இருந்த அமேதியில் யார் காங்., வேட்பாளராக போட்டியிட உள்ளார் என்பதும் முடிவாகவில்லை.இந்நிலையில் ரேபரேலியில் சோனியா மகள் பிரியங்கா களம் இறக்கப்பட உள்ளதாக செய்திகள் தெரிவிக்கின்றன. காங்., அதிகாரப்பூர்வமாக பிரியங்காவை அறிவித்தால், அவரை எதிர்த்து பா.ஜ.,வின் தற்போதைய பிலிபித் தொகுதி எம்.பி.யும், மேனகாவின் மகனுமான வருணை நிறுத்த பா.ஜ., மேலிடம் ஆலோசித்து வருவதாக கூறப்படுகிறது. எனினும் இதனை வருண் மறுத்துள்ளதாக தகவல்கள் தெரிவிக்கின்றன.