நான் வயிறு எரிந்து சொல்கிறேன் அன்புமணி அரசியல் பயணம் முடிந்தது: கொந்தளிக்கிறார் ராமதாஸ்

சென்னை: ''நான் வயிறு எரிந்து சொல்கிறேன். அன்புமணியின் அரசியல் பயணம் முடிந்து விட்டது. தேர்தல் கமிஷன் வரை பணம் சென்றாலும், நீதிமன்றத்தில் நியாயம் கிடைக்கும்,'' என, பா.ம.க., நிறுவனர் ராமதாஸ் மிகக் கடுமையாக பேசியுள்ளார். பா.ம.க.,வில் நிறுவனர் ராமதாசுக்கும், அவரது மகன் அன்புமணிக்கும் இடையே ஓராண்டாக மோதல் நீடிக்கிறது. இரு பிரிவாக கட்சி செயல்படும் நிலையில், அன்புமணியை தலைவராகவும், அவரது தரப்பை பா.ம.க.,வாக அங்கீகரித்தும் தேர்தல் கமிஷன் அறிவித்துள்ளது. ராமதாஸ் தரப்பில் அளித்த ஆவணங்களை தேர்தல் கமிஷன் ஏற்க மறுத்துவிட்டது. இதனால், ராமதாஸ் தலைமையிலான பா.ம.க.,வினர் கடும் அதிர்ச்சியடைந்துள்ளனர். இந்நிலையில், கடலுார் மாவட்டம், வடலுாரில் நேற்று, ராமதாஸ் தரப்பு பா.ம.க.,வின் மாவட்ட ஒருங்கிணைந்த பொதுக்குழு கூட்டம் நடந்தது. அதில், ராமதாஸ் பேசியதாவது: எனக்கொரு மகன் பிறப்பான்; அவன் என்னைப் போலவே இருப்பான் என்பர். ஆனால், எனக்கு நடந்த கொடுமை அனைவருக்கும் தெரியும் . என் உயிரைத் தவிர, அனைத்தையும் என் மகன் பறித்து விட்டான். சூழ்ச்சி செய்து, தன்னை பா.ம.க., தலைவர் என, அன்புமணி சொல்லியிருக்கிறார். வன்னியர் உள்ளிட்ட ஒட்டுமொத்த தமிழக மக்களும், மற்ற அரசியல் கட்சிகளும் அவரது சூழ்ச்சியை புரிந்து கொண்டுள்ளனர். பணம் பத்தும் செய்யும் நான் வளர்த்த கட்சியை அன்புமணி அபகரிக்க பார்க்கிறார். அதை அனுமதிக்க முடியாது. எனக்கு உதவியாக, என் மூத்த மகள் ஸ்ரீகாந்தியை பா.ம.க., செயல் தலைவராக நியமித்துள்ளேன். பா.ம.க., விஷயத்தில் தேர்தல் கமிஷன் முடிவை எதிர்த்து, டில்லி உயர் நீதிமன்றத்தில் வழக்கு தொடர்ந்துள்ளோம். உண்மையை சொன்னாலும் தேர்தல் கமிஷனுக்கு புரியவில்லை. பணம் பத்தும் செய்யும் என்பர். தேர்தல் கமிஷன் வரைக்கும் பணம் சென்று விட்டது. நீதிமன்றத்தில் எங்களுக்கு நியாயம் கிடைக்கும்; உச்ச நீதிமன்றத்துக்கு அன்புமணி சென்றாலும் நான் தான் வெல்வேன். என்னை தோற்கடிக்க யாராலும் முடியாது. பாச்சா பலிக்காது அன்புமணியை படிக்க வைத்து, டாக்டர் ஆக்கியது; மத்திய அமைச்சர் ஆக்கியது; பா.ம.க., தலைவர் ஆக்கியது என, எத்தனையோ தவறுகளை செய்திருக்கிறேன். இப்போது, என்னோடு மோத நினைக்கிறார். நான் இதய பரிசோதனைக்காக மருத்துவமனையில் இருந்தபோது, மற்ற கட்சிகள், சமுதாயங்களைச் சேர்ந்த தலைவர்கள், என்னை சந்தித்து நலம் விசாரித்தனர். ஆனால், அன்புமணி மருத்துவமனைக்கு வந்து, டாக்டரிடம் விசாரித்து விட்டு சென்று விட்டார். அப்போதுதான் அவரை, உலகம் சரியாக புரிந்து கொண்டது. இனி வன்னிய மக்களை யாரும் ஏமாற்ற முடியாது. அன்புமணி பாச்சா பலிக்காது. தலைமை தேர்தல் கமிஷனில் வேண்டுமானால் அன்புமணி வெற்றி பெறலாம். ஆனால், என் பக்கம் மக்கள் இருக்கின்றனர்; நீதி, நியாயம் இருக்கிறது. நீதி வெற்றி பெறும். தமிழகத்தில் 96,000 கிராமங்களுக்கு நேரில் சென்று, வியர்வை சிந்தி, ஆலமரமாக, பா.ம.க.,வை வளர்த்தேன். அந்த ஆலமரத்தில், கிளையின் ஒரு முனையில் அமர்ந்து கொண்டு, அடி கிளையை அன்புமணி வெட்டி கொண்டிருக்கிறார். நான் வயிறு எரிந்து சொல்கிறேன். அன்புமணியின் அரசியல் பயணம் முடிந்து விட்டது. இனி வெல்லப் போவது நான்தான். என் உழைப்பை, உரிமையை விட்டுக் கொடுக்க முடியாது. இவ்வாறு அவர் பேசினார்.