விஜய் ரோடு ஷோவுக்கு அனுமதி மறுப்பா? :ஆலோசிப்பதாக புதுச்சேரி முதல்வர் விளக்கம்

புதுச்சேரி: த.வெ.க., தலைவர் விஜய், புதுச்சேரியில் ரோடு ஷோ நடத்த அனுமதி கோரி கொடுத்த மனு மீது ஆலோசித்து முடிவு எடுக்கப்படும் என புதுச்சேரி முதல்வர் ரங்கசாமி தெரிவித்தார். தமிழக வெற்றிக் கழகம் தலைவர் விஜய், 'ரோடு ஷோ' வாயிலாக மக்களை சந்தித்து வந்தார். கரூரில், கூட்ட நெரிசலில் சிக்கி 41 பேர் பலியானதை தொடர்ந்து, அவரது சுற்றுப்பயணம் நிறுத்தி வைக்கப்பட்டுள்ளது. சேலத்தில் மீண்டும் பயணத்தை துவங்க திட்டமிட்ட நிலையில், போலீசார் அனுமதி மறுத்ததோடு, ஒரு மாதத்துக்கு முன்பே மனு அளிக்குமாறு தெரிவித்தனர். இந்நிலையில், வரும் 5ம் தேதி புதுச்சேரியில், 'ரோடு ஷோ' நடத்த விஜய் திட்டமிட்டுள்ளார். இதற்காக, கடந்த 26ம் தேதி, புதுச்சேரி டி.ஜி.பி., அலுவலகத்தில், த.வெ.க.,வினர் மனு அளித்தனர். புதுச்சேரி முதல்வர் ரங்கசாமியையும் சந்தித்து மனு கொடுத்தனர். மூன்று நாட்களாகியும் போலீசார் பதிலளிக்க வில்லை. இதனால், த.வெ.க., பொதுச்செயலர் ஆனந்த், முன்னாள் எம்.எல்.ஏ., சாமிநாதன் ஆகியோர், நேற்று டி.ஜி.பி.,யை சந்திக்க காவல்துறை தலைமை அலுவலகம் சென்றனர். ஆனால், அங்கு டி.ஜி.பி., உள்ளிட்ட எந்த அதிகாரிகளும் இல்லை. டில்லியில் நடக்கும் போலீஸ் மாநாட்டிற்கு டி.ஜி.பி., சென்றுள்ளதாகவும், நாளை டிச.,1ல் தான் அலுவலகம் வருவார் எனவும் தெரிவிக்கப்பட்டது. ஆனந்திடம், இது பற்றி கேட்டபோது, பதிலளிக்கவில்லை. இதையடுத்து, புதுச்சேரியில் விஜயின் 'ரோடு ஷோ' நிகழ்ச்சிக்கு போலீஸ் அனுமதி மறுத்து விட்டதாக தகவல் பரவியது. ஆனால், 'மனு மீது எந்த உத்தரவும் பிறப்பிக்கப்படவில்லை' என போலீஸ் வட்டாரத்தில் விளக்கம் அளித்தனர். இந்நிலையில், விஜய் 'ரோடு ஷோ' நடத்த அனுமதி அளிக்கப்படுமா என முதல்வர் ரங்கசாமியிடம் கேட்டபோது, ''புதுச்சேரி தலைமை செயலர் மற்றும் டி.ஜி.பி., ஆகியோருடன் கலந்து ஆலோசித்து முடிவு எடுக்கப்படும்,'' என்றார்.