குக்கர் தொழிற்சாலையில் தீ பல லட்ச ரூபாய் பொருள் நாசம்

ஸ்ரீபெரும்புதுார்: ஒரகடம் அருகே, வல்லம் -வடகால் சிப்காட் தொழிற்பூங்காவில், ஜெ.பி. என்டர்பிரைசஸ் எனும் சமையல் பாத்திரங்கள் தயாரிக்கும் தனியார் தொழிற்சாலை இயங்கி வருகிறது. நேற்று அதிகாலை 1:30 மணிக்கு தொழிற்சாலையில் தீ விபத்து ஏற்பட்டது. மளமளவென தொழிற்சாலை முழுதும் தீ பரவி கொழுந்து விட்டு எரிந்தது. தகவலறிந்து, ஸ்ரீபெரும்புதுார், ஒரகடம், படப்பை உள்ளிட்ட தீயணைப்பு நிலைய வீரர்களும், நான்கு தனியார் தீயணைப்பு வாகனங்கள் உட்பட ஏழு தீயணைப்பு வாகனங்கள் சம்பவ இடத்திற்கு வந்து, இரண்டு மணி நேரம் போராடி தீயை அணைத்தனர். தீ விபத்தில், தொழிற்சாலை இயந்திரங்கள், ஜெனரேட்டர், குக்கர் உள்ளிட்ட பல லட்சம் ரூபாய் மதிப்பிலான பொருட்கள் தீக்கிரையாயின. விபத்து குறித்து ஒரகடம் போலீசார் விசாரிக்கின்றனர்.