சார் - பதிவாளர் அலுவலகத்தில் விடிய விடிய போலீஸ் ரெய்டு கணக்கில் வராத ரூ. 1.32 லட்சம் பறிமுதல்

அன்னுார்,:கோவை மாவட்டம், அன்னுார் சார் - பதிவாளர் அலுவலகத்தில், அதிக அளவில் லஞ்சம் புழங்குவதாக மாவட்ட நிர்வாகத்திற்கு புகார்கள் சென்றன. இதையடுத்து, மாவட்ட ஆய்வு குழு ஆய்வாளர் ராஜேந்திரன் தலைமையில், லஞ்ச ஒழிப்பு துறை போலீசார் எட்டு பேர் குழு நேற்று முன்தினம் இரவு 7:30 மணிக்கு அன்னுார் சார் - பதிவாளர் அலுவலகத்தில் அதிரடியாக நுழைந்தது.அலுவலகத்தில அந்த குழு விடிய விடிய சோதனை நடத்தியது. 12 மணி நேர சோதனைக்கு பின், அலுவலகத்தில் இருந்து, கணக்கில் வராத 1.32 லட்சம் ரூபாய் பறிமுதல் செய்யப்பட்டது. லஞ்ச ஒழிப்புத்துறை அதிகாரிகள் கூறியதாவது:சார் - பதிவாளர் மீது துறை ரீதியான நடவடிக்கைக்கு பத்திரப்பதிவுத்துறை தலைமைக்கு பரிந்துரைக்கப்பட்டுள்ளது. பத்திர எழுத்தர்கள் இருவரின் அலுவலகத்திலும் சோதனை நடத்தி பணம் கைப்பற்றப்பட்டது. எனினும் அவர்கள் உரிய ஆவணங்களை சமர்ப்பித்ததையடுத்து, அந்த தொகை திருப்பி வழங்கப்பட்டது.இவ்வாறு அவர்கள் தெரிவித்தனர்.