சென்னையை சேர்ந்த 20 பேர் வேன் கவிழ்ந்ததில் படுகாயம்

பெரம்பலுார்: பெரம்பலுார் அருகே வேன் கவிழ்ந்து விபத்திற்குள்ளானதில், சென்னையை சேர்ந்த, 20 பேர் படுகாயமடைந்தனர். சென்னை, அம்பேத்கர் நகரை சேர்ந்த, 20 பேர், கரூரில் நடைபெறும் உறவினர் திருமணத்தில் பங்கேற்க, 'மஹிந்திரா மேக்சி கேப்' வேனில் நேற்று முன்தினம் இரவு, 12:00 மணிக்கு புறப்பட்டனர். வேனை, சிவகணேஷ், 42, ஓட்டினார். நேற்று அதிகாலை, 5:45 மணிக்கு பெரம்பலுார் மாவட்டம், சின்னாறு பாலம் அருகே வந்தபோது, டிரைவரின் கவனக்குறைவால், வேன் சாலை தடுப்பில் ஏறி கவிழ்ந்தது. இதில், 13, வயது முதல், 70 வயது வரையிலான, 20 பேர் படுகாயம் அடைந்தனர். மங்களமேடு போலீசார், காயமடைந்தவர்களை மீட்டு பெரம்பலுார் அரசு மருத்துவ மனையில் சேர்த்தனர். விபத்து குறித்து போலீசார் விசாரிக்கின்றனர்.