டிச.5 ல் பள்ளி மேலாண்மை குழு கூட்டம்  மாணவர்கள் விடுமுறையை தவிர்க்க அறிவுரை

திருவாடானை: திருவாடானை வட்டாரத்தில் டிச.,5 ல் பள்ளி மேலாண்மை குழு கூட்டம் நடக்கிறது. மாணவர்கள் விடுப்பு எடுக்காமல் இருக்க அறிவுரை வழங்க முடிவு செய்யபட்டுள்ளது. ஒருங்கிணைந்த பள்ளிக்கல்வித்துறை சார்பில் அரசு பள்ளிகளின் முன்னேற்றத்தில் பங்களிக்கும் வகையில் மாதம் தோறும் பள்ளி மேலாண்மை குழு கூட்டம் நடந்து வருகிறது. அடுத்த மாதத்துக்கான பள்ளி மேலாண்மை குழு கூட்டம் டிச.5ல் வெள்ளிக்கிழமை மதியம் 3:00 முதல் மாலை 4:30 மணி வரை நடத்த ஏற்பாடுகள் செய்யப்பட்டுள்ளன. இது குறித்து திருவாடானை வட்டார கல்வி அலுவலர் ஆரோக்கியசாமி கூறியதாவது டிச.5ல் நடைபெறும் பள்ளி மேலாண்மை குழு கூட்டத்தில் பல்வேறு கூட்ட பொருள்கள் குறித்து விவாதித்து தீர்மானம் நிறைவேற்ற அறிவிப்பு செய்யப்பட்டுள்ளது. பள்ளி மேலாண்மை குழு கூட்டத்தில் பள்ளி மாணவர்களின் கற்றல் திறன் மேம்பாடு குறித்தும் விவாதிக்கப்பட உள்ளன. பள்ளிகளில் இருந்து இடையில் நின்ற மற்றும் இடையில் நிற்க வாய்ப்புள்ள குழந்தைகளை கண்டறிந்து, அவர்களை தொடர்ந்து பள்ளிக்கு வரவழைக்க ஏற்பாடுகள் செய்வது தொடர்பாக தீர்மானம் நிறைவேற்றப்படுகிறது. மாணவர்கள் அடிக்கடி விடுப்பு எடுப்பதை தவிர்க்க அறிவுரை வழங்கப்படும் என்றார்.