சிறுவன் ஓட்டிய பைக் மோதி முதியவர் பலி

தாரமங்கலம்: தாரமங்கலம், நஞ்சப்ப முதலியார் தெருவை சேர்ந்தவர் ராஜேந்திரன், 62. இவர் நேற்று முன்தினம் இரவு, 10:30 மணிக்கு, தாரமங்கலம் - ஜலகண்டாபுரம் சாலையை கடந்து, ஹோட்டலுக்கு செல்ல முயன்றார். அப்போது, தாரமங்கலத்தை சேர்ந்த, 17 வயது சிறுவன், ஹெல்மெட் அணியாமல், 'பல்சர்' பைக்கை ஓட்டிவந்து, ராஜேந்திரன் மீது மோதினான். இதில் ராஜேந்திரன் பலத்த காயம் அடைந்தார். அவரை மக்கள் மீட்டு, சேலம் அரசு மருத்துவமனைக்கு அனுப்பினர். அங்கு நேற்று காலை, அவர் உயிரிழந்தார். பைக் ஓட்டி வந்த, 17 வயது சிறுவனுக்கு கையில் காயம் ஏற்பட்டு, ஓமலுார் அரசு மருத்துவமனையில் அனுமதிக்கப்பட்டுள்ளார். தாரமங்கலம் போலீசார் விசாரணையில், சிறுவன் ஓட்டி வந்த பைக்கில், மற்றொரு சிறுவன் அமர்ந்து வந்ததும் தெரிந்தது. தொடர்ந்து போலீசார் விசாரிக்கின்றனர்.