சுற்றுலா பயணிகளை மீட்ட தீயணைப்பு துறையினருக்கு கேரள முதல்வர் பாராட்டு

மூணாறு: சாகச ஆகாய விருத்துக்கு சென்று கிரைனில் 120 அடி உயரத்தில் சிக்கி தவித்த சுற்றுலா பயணிகளை மீட்ட தீயணைப்பு துறையினரை கேரள முதல்வர் பினராயிவிஜயன் பாராட்டினார். மூணாறு அருகே ஆனச்சாலில் 'ஸ்கை டைனிங்' எனும் சாகச ஆகாய உணவகம் செயல்பட்டு வருகிறது. அதில் கிரைன் மூலம் அந்தரத்தில் தொங்கியவாறு சுற்றுச் சூழலை ரசித்தபடி ஒரே நேரத்தில் 15 பேர் அமர்ந்து உணவு அருந்தலாம். கோழிக்கோட்டைச் சேர்ந்த முகம்மது ஷப்வான், மனைவி தவ்பீனா மகன் இவான் 7, மகள் இனாரா 3, ஆகியோருடன் நேற்று முன்தினம் மதியம் ஆகாய விருந்துக்கு சென்றார். அப்போது கிரைனில் ஏற்பட்ட தொழில் நுட்ப கோளாறு காரணமாக சுற்றுலா பயணிகள் நான்கு பேர், மையத்தின் ஊழியர் ஹரிபிரியா ஆகியோர் 120 அடி உயரத்தில் சிக்கி கொண்டனர். அவர்களை மூணாறு, அடிமாலி, இடுக்கி ஆகிய பகுதிகளைச் சேர்ந்த தீயணைப்பு துறையினர் போராடி பாதுகாப்பாக மீட்டனர். கேரள முதல்வர் பினராயி விஜயன், மூணாறு தீயணைப்பு நிலைய உதவி அதிகாரி அஜய்குமார் தலைமையிலான குழுவை வெகுவாக பாராட்டினார். வழக்கு பதிவு: 'ஸ்கை டைனிங்' மையம் பாதுகாப்பு ஏற்பாடுகள் இன்றி செயல்பட்டதால், அதன் உரிமையாளர்கள் சாஜன் ஜோசப், பிரவீன் ஆகியோர் மீது வெள்ளத்தூவல் போலீசார் வழக்கு பதிவு செய்தனர். இச்சம்பவம் குறித்து விசாரித்து அறிக்கை தாக்கல் செய்யுமாறு இடுக்கி கலெக்டர் தினேசன் செருவாய், தேவிகுளம் தாசில்தாருக்கு உத்தர விட்டார். தற்போது மையம் செயல்பட வருவாய்துறையின் தற்காலிகமாக தடை விதித்தனர். அதன் ஆவணங்கள் பரிசோதித்த பிறகு மையத்தை நிரந்தரமாக மூடுவது குறித்து ஆலோசிக்கப்படும், என அதிகாரிகள் தெரிவித்தனர்.