திருநெல்வேலி அல்வா கடைகளில் உணவு பாதுகாப்புத்துறை சோதனை

திருநெல்வேலி: சபரிமலை சீசன் காரணமாக திருநெல்வேலிக்கு ஐயப்ப பக்தர்கள் அதிகம் வரும் நிலையில், டவுன் மற்றும் ஜங்ஷனில் உள்ள அல்வா கடைகளில் உணவு பாதுகாப்புத் துறை அதிகாரிகள் சோதனை நடத்தினர். சபரிமலைக்கு சென்று, திரும்பும் பக்தர்கள் திருநெல்வேலியில் அல்வா வாங்குவதை வழக்கமாகக் கொண்டுள்ளனர். இந்த அவசரத்தை பயன்படுத்திக் கொண்டு பிரபல நிறுவனங்களின் பெயர்களில் போலியான அல்வாக்களை சிலர் விற்பனை செய்கின்றனர். மாவட்ட உணவு அலுவலர் புஷ்பராஜ் தலைமையில் நடைபெற்ற சோதனையில், டவுன் இருட்டுக்கடை உள்பட பல அல்வா கடைகளில் சோதனை நடந்தது. லேபிள் மற்றும் தயாரிப்பு தேதி குறிப்பிடப்படாத நேந்திரம் சிப்ஸ் பாக்கெட்டுகள் பறிமுதல் செய்யப்பட்டன. சில கடைகள் லைசென்ஸ் பெறாமல் விற்பனை செய்தது கண்டறியப்பட்டதால், உடனடியாக விற்பனையை நிறுத்துமாறு உத்தரவிடப்பட்டது. கடைகளில் விற்பனை செய்யும் அல்வா கவர்களில் தயாரிப்பு தேதி, காலாவதி தேதி மற்றும் கடை பெயரை குறிப்பிடாவிட்டால் கடுமையான நடவடிக்கை எடுக்கப்படும் என அதிகாரிகள் எச்சரித்தனர்.