வேப்பம்பட்டு பகுதியில் மின் கணக்கீடு மாதம் மாற்றம்

திருவள்ளூர்: வேப்பம்பட்டு பகுதியில் மின் கணக்கீடு செய்யும் மாதம் மாற்றம் செய்யப்பட்டு உள்ளது. திருமழிசை கோட்ட மின்வாரிய செயற்பொறியாளர் வெளியிட்டுள்ள செய்திக்குறிப்பு: செவ்வாப்பேட்டை மின்வாரிய அலுவலகம், செவ்வாப்பேட்டை மற்றும் வேப்பம்பட்டு என, இரண்டாக பிரிக்கப்பட்டுள்ளது. இதன் காரணமாக, வேப்பம்பட்டு மற்றும் அயத்துார் ஊராட்சிகளை உள்ளடக்கிய மின்நுகர்வோர்களுக்கு, டிச., மற்றும் ஜன., மாதங்களில், மின்கணக்கீடு செய்யப்பட உள்ளது. எனவே, வேப்பம்பட்டு அலுவலகத்திற்கு உட்பட்ட எஸ்.டி., பெருமாள் நகர், திருநகர், மார்ஸ் நகர், அண்ணா நகர், விநாயகபுரம், பூம்புகார் நகர், தசரத நகர், ராமகிருஷ்ணா நகர், வேப்பம்பட்டு பஜார் மற்றும் அதை சுற்றியுள்ள பகுதிகளில், இரட்டை படை மாத மின்கணக்கீடு செய்யப்பட உள்ளது. அதன்படி, மேற்கண்ட பகுதிகளில் இனி வரும் காலத்தில், டிசம்பர், பிப்ரவரி, ஏப்ரல், ஜூன், ஆகஸ்ட், அக்டோபர் ஆகிய மாதங்களில் மின் கணக்கெடுப்பு எடுக்கப்படும். எனவே, மேற்கண்ட பகுதியில் உள்ள மின்நுகர்வோர், டிச., மாதம் மீண்டும் மின் கட்டணம் செலுத்துமாறு கேட்டுக் கொள்ளப்படுகிறது. இவ்வாறு அதில் கூறப்பட்டுள்ளது.