குடிநீர் வழங்கவில்லை பெண்கள் திடீர் மறியல்

துாத்துக்குடி:துாத்துக்குடி மாவட்டம், கோவில்பட்டி அருகே உள்ள சிவந்திபட்டி பஞ்சாயத்துக்குள்பட்ட கரிசல்குளம் கிராமத்தில், 450க்கும் மேற்பட்ட குடும்பங்கள் வசித்து வருகின்றன. கிராமத்தில் உள்ள தெற்கு தெரு பகுதிகளுக்கு, 10 தினங்களுக்கு மேலாக குடிநீர் வினியோகம் செய்யப்படவில்லை என்று கூறப்படுகிறது.ஆத்திரமடைந்த அப்பகுதி மக்கள், கோவில்பட்டி -- பசுவந்தனை சாலையில் நேற்று திடீரென மறியலில் ஈடுபட்டனர். கொப்பம்பட்டி போலீசார் அவர்களிடம் பேச்சு நடத்தினர். சீராக குடிநீர் வழங்க நடவடிக்கை எடுக்கப்படும் என்று போலீசார் உறுதி அளித்ததை தொடர்ந்து போராட்டத்தில் ஈடுபட்டவர்கள் கலைந்து சென்றனர்.போராட்டத்தில் ஈடுபட்ட பெண்கள் கூறியதாவது:கரிசல்குளம் பகுதிக்கு சீராக குடிநீர் வினியோகம் செய்யப்படுவது இல்லை. 'மோட்டார் பழுது' என கூறி ,அடிக்கடி குடிநீர் வினியோகத்தை நிறுத்தி விடுகின்றனர். அதை சரி செய்து, நிரந்தரமாக குடிநீர் வருவதற்கு நடவடிக்கை எடுக்க வேண்டும்.இவ்வாறு அவர்கள் கூறினர்.