எஸ்.ஐ.ஆர். படிவங்கள் ஒப்படைப்பதில் தாமதம் கால அவகாசம் நீடிப்பு; அதிகாரிகள் நிம்மதி

திருப்பூர்: தீவிர திருத்த கால அவகாசம் ஒரு வாரம் நீட்டிக்கப்பட்டுள்ளதால், திருப்பூர் மாவட்ட தேர்தல் பிரிவு அதிகாரிகள் மற்றும் கணக்கீட்டு பணிகளில் ஈடுபட்டுள்ள அரசுத்துறை அலுவலர்கள் நிம்மதி அடைந்துள்ளனர். தமிழகத்தில், எஸ்.ஐ.ஆர். எனப்படும் வாக்காளர் பட்டியல் சிறப்பு தீவிர திருத்தம், கடந்த நவ. 4 ல் துவங்கி நடைபெற்று வருகிறது. வாக்காளர்களுக்கு கணக்கீட்டு படிவம் வழங்கப்பட்டு, பூர்த்தி செய்து பெறப் பட்டு வருகிறது. வாக்காளர்களிடமிருந்து பூர்த்தி செய்த படிவங்களை பெற்று, ஆன்லைனில் பதிவு செய்வதற்கு, இம்மாதம் 4ம் தேதி கடைசி நாள்; வாக்காளர் வரைவு பட்டியல் 9ம் தேதி வெளியிடப்படும் என அறிவிக்கப்பட்டிருந்தது. திருப்பூர் மாவட்டத்தில் எட்டு சட்டசபை தொகுதிகளில், மொத்தம் 24 லட்சத்து 44 ஆயிரத்து 929 வாக்காளர் உள்ளனர். ஒவ்வொரு வாக்காளருக்கு இரண்டு வீதம், கணக்கீட்டு படிவங்கள் அச்சிடப்பட்டு, ஓட்டுச்சாவடி நிலை அலுவலர்கள் (பி.எல்.ஓ.) வாயிலாக வீடு தேடிச் சென்று வழங்கப்பட்டது. கடந்த 15 முதல், வாக்காளர்களிடமிருந்து படிவங்களை பூர்த்தி செய்து பெற்று, ஆன்லைனில் பதிவேற்றம் செய்யும் பணிகள் நடைபெற்றுவருகின்றன. தொகுதிக்கு ஒருவர் வீதம் எட்டு வாக்காளர் பதிவு அலுவலர்கள், 27 உதவி வாக்காளர் பதிவு அலுவலர்கள், 266 பி.எல்.ஓ. மேற்பார்வையாளர்கள், 2,536 பி.எல்.ஓ.க்கள் மற்றும் வருவாய்த்துறை, கூட்டுறவு, வட்டார வளர்ச்சி, மாநகராட்சி, நகராட்சி என பல்வேறு அரசு துறையினர், தீவிர திருத்த பணிகளில் ஈடுபட்டுவருகின்றனர். ஒப்படைக்கப்படாத படிவங்கள் போதிய விழிப்புணர்வு இல்லாததால், படிவங்களை பெற்றுக்கொண்ட வாக்காளர் பெரும்பாலானோர், இன்னும் பூர்த்தி செய்து வழங்காமல் உள்ளனர். இதையடுத்து, வாக்காளர்களிடமிருந்து படிவங்களை பூர்த்தி செய்து பெற்று, தீவிர திருத்த பணியில் கூடுதல் பங்களிப்பு செலுத்துமாறு, பூத் ஏஜென்டுகளை கலெக்டர் அறிவுறுத்தினார். வாக்காளர் பதிவு அலுவலர்கள், தங்கள் தொகுதிக்கு உட்பட்ட பகுதிகளில், படிவங்களை பூர்த்தி செய்து வழங்க வலியுறுத்தி, ஆட்டோ வாயிலாக, வாக்காளர் மத்தியில் விழிப்புணர்வு ஏற்படுத்திவருகின்றனர். ஒவ்வொரு பி.எல்.ஓ.,க்களுடனும், அலுவலர்கள் ஐந்து பேர், வாக்காளர்களை தேடிச் சென்று, படிவங்களை பூர்த்தி செய்து பெறுகின்றனர். கலெக்டர் அலுவலகம், மாநகராட்சி அலுவலகம் உள்பட வாக்காளர் பதிவு அலுவலகங்களில், வாக்காளர்களிடமிருந்து பெறப்பட்ட படிவங்களை, ஆன்லைனில் பதிவேற்றம் செய்யும் பணி, இரவு பகலாக நடைபெற்றுவருகிறது. கால அவகாசம் குறைவாக இருந்ததால், அனைத்து வாக்காளரிடமிருந்தும் படிவங்களை பூர்த்தி செய்து பெற்று, ஆன்லைனில் பதிவேற்றம் செய்ய முடியுமா என்கிற பதட்டம் மாவட்ட தேர்தல் பிரிவு அதிகாரிகளை தொற்றிக்கொண்டிருந்தது. அதிகாரிகள் நிம்மதி புயல் காரணமாக, தமிழகம் முழுவதும் பரவலாக மழை பெய்துவருகிறது. தீவிர திருத்த களப்பணிகளில் தொய்வு ஏற்பட்டுள்ளது. இதையடுத்து, தீவிர திருத்த கால அவகாசத்தை ஒருவாரம் நீட்டிப்பு செய்து, தேர்தல் கமிஷன் நேற்று அறிவித்துள்ளது. வாக்காளரிடமிருந்து படிவம் பூர்த்தி செய்து பெற்று, ஆன்லைனில் பதிவேற்றம் செய்வதற்கான கால அவகாசம், 4ம் தேதியிலிருந்து 11ம் தேதியாகவும்; வரைவு பட்டியல் வெளியாகும் தேதி, 9ல் இருந்து, 16ம் தேதியாகவும் நீட்டிக்கப்பட்டுள்ளது. கூடுதல் கால அவகாசம் கிடைத்திருப்பது தேர்தல் பணிகளில் ஈடுபட்டுள்ள அலுவலர்களை நிம்மதி பெருமூச்சு விடச் செய்திருக்கிறது.