சாலை விபத்தில் பெற்றோர் உயிரிழப்பு பிள்ளைகளுக்கு ரூ.1.21 கோடி இழப்பீடு

வேலுார்: சாலை விபத்தில் பெற்றோரை இழந்த பிள்ளைகளுக்கு, 1.21 கோடி ரூபாய் இழப்பீடு வழங்க மோட்டார் வாகன விபத்து இழப்பீடு தீர்ப்பாயம் உத்தரவிட்டுள்ளது. வேலுார், விரிஞ்சிபுரத்தை சேர்ந்தவர் ஆனந்தன், 49; போலீஸ் சிறப்பு எஸ்.ஐ.,யாக பணியாற்றினார். இவரது மனைவி உமாமகேஸ்வரி, 39, மகன் அருண், மகள்கள் சந்தியா, 20; ஐஸ்வர்யா, 7, ஆகியோர், 2014ல் வேலுாரில் இருந்து பெங்களூருக்கு காரில் சுற்றுலா சென்றனர். அதே போல, சத்துவாச்சாரியை சேர்ந்த பாபு, தன் மனைவி ராணி, மகன் அருண் ஆகியோருடன் காரில் பெங்களூரு நோக்கி சென்று கொண்டிருந்தார். கிருஷ்ணகிரி மாவட்டம், கோபசன்டிரம் அருகே தேசிய நெடுஞ்சாலையில், கர்நாடகா பதிவெண் கொண்ட லாரி பழுதாகி, சாலையின் நடுவே எந்த சிக்னலும் இல்லாமல் நின்று கொண்டிருந்தது. அதை கவனிக்காமல், பாபு குடும்பத்தினர் சென்ற கார் லாரி மீது மோத, பின்னால் வந்த ஆனந்தன் குடும்பத்தினர் சென்ற கா ரும் லாரியின் பின் பக்கத்தில் மோதி விபத்துக்குள்ளானது. இதில், பாபு குடும்பத்தினர் மூன்று பேர், ஆனந்தன், உமாமகேஸ்வரி, சந்தியா ஆகிய 6 பேர் உயிரிழந்தனர். பெற்றோர், சகோதரியை இழந்த அருண், ஐஸ்வர்யா, வேலுார், மோட்டார் வாகன விபத்து இழப்பீடு கோரும் தீர்ப்பாயத்தில் வழக்கு தொடர்ந்தனர். இந்த வழக்கில், 'விபத்துக்கு, லாரி டிரைவரின் அலட்சியம், அஜாக்கிரதையுமே காரணம். மனுதாரர்களுக்கு இழப்பீடாக, 74.14 லட்சம் ரூபாயை ஆண்டுக்கு 7.5 சதவீத வட்டியுடன் வாகன உரிமையாளர்கள், இன்சூரன்ஸ் நிறுவனம் இணைந்து வழங்க வேண்டும்' என, நீதிபதி சாண்டில்யன் உத்தரவிட்டார். பாபு குடும்பம் இறப்புக்கு, பாபுவின் மகள்கள் ஷாலினி, பிரீத்தி ஆகியோருக்கு, 46.74 லட்சம் ரூபாயை ஆண்டுக்கு, 7.5 சதவீத வட்டியுடன் வழங்க நீதிபதி உத்தரவிட்டார்.