நிலுவை வழக்குகளை விரைந்து முடிக்க சிறப்பு சமரச தீர்வு முகாம்

ஸ்ரீவில்லிபுத்துார்: விருதுநகர் மாவட்ட நீதிமன்றங்களில் நிலுவையில் உள்ள வழக்குகளைவிரைந்து முடிக்க, அனைத்து நீதிமன்றங்களிலும் செப். 30 வரை சிறப்பு சமரச தீர்வு முகாம் நடத்தப்பட்டு வருகிறது. இதை மக்கள் பயன்படுத்தி தீர்வு காணும்படி மாவட்ட முதன்மை அமர்வு நீதிமன்ற நீதிபதி ஜெயக்குமார் கேட்டுக் கொண்டுள்ளார்.அவரின் செய்தி குறிப்பு: நிலுவை வழக்குகளை விரைந்து முடிக்க சமரச தீர்வு மையம் மூலமாக நடவடிக்கை எடுக்கப்பட்டு வருகிறது. இதற்காக செப். 30 வரை சிறப்பு முகாம்கள் நடக்கிறது.இதில் மணவாழ்க்கை, சொத்து வழக்கு, பணப்பிரச்னை, காசோலை வழக்குகள், நிதி நிறுவனத்தில் பண பரிவர்த்தனை தொடர்பான வழக்குகள், குற்ற வழக்குகள், சமரசம் ஏற்படக்கூடிய வழக்குகள்,மோசடி வழக்குகள், வங்கி தொடர்பான வழக்குகள் உட்பட பல வகையான வழக்குகள் விசாரிக்கப்பட்டு, பயிற்சி பெற்ற மீடியேட்டர் மூலம் வழக்குகளை பேசி இருதரப்பும் ஏற்றுக்கொள்ளும் வகையில் தீர்வு காணப்படும்.இம்முகாம்கள் ஸ்ரீவில்லிபுத்துார் ஒருங்கிணைந்த நீதிமன்றத்தில் உள்ள மாவட்ட சமரச மையம், சிவகாசி, சாத்துார், விருதுநகர், அருப்புக்கோட்டை, ராஜபாளையம் நீதிமன்றங்களில் உள்ள துணை சமரச மையங்களிலும் நடத்தப்படுகிறது.