திருவண்ணாமலையில் மினி டைடல் பூங்கா அடிக்கல் நாட்டினார் முதல்வர் ஸ்டாலின்

சென்னை:முதல்வர் ஸ்டாலின் நேற்று தலைமை செயலகத்தில், பல்வேறு பகுதிகளில் முடிவுற்ற பணிகளை துவக்கி வைத்ததுடன், பல புதிய பணிகளுக்கும், 'வீடியோ கான்பரன்ஸ்' வழியே அடிக்கல் நாட்டினார். அதன் விபரம்:  திருவண்ணாமலையில் 37 கோடி ரூபாய் மதிப்பில், 63,200 சதுர அடியில், 'மினி டைடல் பூங்கா' கட்டப்பட உள்ளது. இதன் வாயிலாக, 600 புதிய வேலை வாய்ப்புகள் உருவாகும். இதற்கு முதல்வர் ஸ்டாலின் நேற்று அடிக்கல் நாட்டினார்.  சுற்றுலாத்துறை சார்பில், தென்காசி - குண்டாறு அணையில் 1.50 கோடி ரூபாயில் வரவேற்பு மையம், உணவகம்; திருப்பத்துார் மாவட்டம் ஏலகிரியில், 2.98 கோடி ரூபாயில், நுழைவு பகுதி, உணவக கட்டடம் கட்டப்பட்டுள்ளன. புதுக்கோட்டை மாவட்டம் முத்துகுடா கடற்கரையில், 3.06 கோடி ரூபாயில் படகுத்துறை, நடைபாதை உட்பட பல்வேறு பணிகள் மேற்கொள்ளப்பட்டு உள்ளன. மதுரையில் ஹோட்டல் தமிழ்நாடு வளாகத்தில், 7 கோடி ரூபாயில் புதிய உணவக கட்டடம் கட்டப்பட்டுள்ளது. இவற்றை முதல்வர் திறந்து வைத்தார்.  சென்னை அரசு அருங்காட்சியக வளாகத்தில், 6.84 கோடி ரூபாயில் கட்டப்பட்ட புதிய நிர்வாக கட்டடத்தையும், முதல்வர் திறந்து வைத்தார்.  தேசிய அளவில் சிறப்பாக செயல்பட்டதற்காக, அரூர் சுப்பிரமணிய சிவா கூட்டுறவு சர்க்கரை ஆலை, செங்கல்வராயன் கூட்டுறவு சர்க்கரை ஆலை, கள்ளக்குறிச்சி - 2 கூட்டுறவு சர்க்கரை ஆலை. தர்மபுரி கூட்டுறவு சர்க்கரை ஆலை, செய்யாறு கூட்டுறவு சர்க்கரை ஆலை ஆகியவற்றுக்கு, தேசிய கூட்டுறவு சர்க்கரை ஆலைகள் சம்மேளனத்தின் விருது கிடைத்துள்ளது. இந்த விருதுகளை முதல்வரிடம் காண்பித்து, சர்க்கரைத்துறை அமைச்சர் ராஜேந்திரன் வாழ்த்து பெற்றார்.  அரூர் கூட்டுறவு சர்க்கரை ஆலை சார்பில், 10.23 கோடி ரூபாய்; கள்ளக்குறிச்சி - 2 கூட்டுறவு சர்க்கரை ஆலை வாயிலாக, 12.3 கோடி ரூபாய், தமிழக அரசின் பங்கு தொகையாக வழங்கப்பட்டது. இதற்கான காசோலைகளை முதல்வர் ஸ்டாலின் பெற்றுக் கொண்டார்.