அடேங்கப்பா.... இத்தனை நாட்களா...: 532 நாட்கள் விடுமுறை எடுத்த ஜோ பைடன் மீது எதிர்க்கட்சிகள் விமர்சனம்

வாஷிங்டன்: அமெரிக்க அதிபர் ஜோ பைடன், தனது பதவிக்காலத்தில் 532 நாட்கள் விடுப்பு எடுத்தது தெரியவந்துள்ளது. இது குறித்து அந்நாட்டு எதிர்க்கட்சிகள் விமர்சித்து வருகின்றன.வரும் நவம்பர் மாதம் அமெரிக்க அதிபர் தேர்தல் நடைபெற உள்ளது. இதில் ஜனநாயக கட்சி சார்பில் கமலா ஹாரீசும், குடியரசு கட்சி சார்பில் டொனால்ட் டிரம்ப்பும் போட்டியிடுகின்றனர். தற்போதைய அதிபர் ஜோ பைடன், அதிபர் தேர்தலில் களமிறங்கினாலும், பின்னர் வயது முதிர்வு காரணமாக ஒதுங்கி கொண்டார். 81 வயதாகும் அவர், கடந்த நான்கு வருடங்களில் எடுத்த விடுப்பு குறித்த தகவல் வெளியாகி உள்ளது. அதன்படி, அவர் 532 நாட்கள் விடுப்பு எடுத்து உள்ளார். அதாவது, அவர் பதவிக்காலத்தில் 40 சதவீத நாட்களை விடுமுறையில் கழித்துள்ளார். இது ஐந்து ஆண்டுகளில் சராசரி அமெரிக்க தொழிலாளி ஒருவருக்கு கிடைப்பதை விட அதிகம். தொழிலாளிக்கு ஆண்டுக்கு சராசரியாக 11 நாட்கள் விடுமுறை கிடைக்கிறது. இந்த கணக்குப்படி, ஜோ பைடன் 48 ஆண்டுகள் எடுக்க வேண்டிய விடுமுறையை 4 ஆண்டுகளில் எடுத்துள்ளார்.

விமர்சனம்

இத்தனை நாட்கள் ஜோ பைடன் விடுமுறை எடுத்ததை அந்நாட்டு எதிர்க்கட்சிகள் கடுமையாக விமர்சித்து உள்ளன. உலகளாவிய நிச்சயமற்ற சூழ்நிலை, உள்நாட்டில் பல்வேறு சவால்கள் நிலவி வரும் சூழலில் அதிபர் பதவியில் இருக்கும் ஒருவர் இத்தனை நாட்கள் விடுமுறை எடுப்பது சரியா என கேள்வி எழுப்பி உள்ளனர்.ஆனால், ஜோ பைடன் ஆதரவாளர்கள் கூறும்போது, பைடன் அலுவலகத்திற்கு வரவில்லை என்றாலும், இருக்கும் இடத்தில் இருந்து பணிபுரிகிறார். விடுமுறையில் இருந்தாலும் கூட தொடர்ச்சியாக வீடியோ கால் மூலம் கூட்டங்களை நடத்தி ஆலோசனை வழங்குகிறார் என சமாளிக்கின்றனர்.