மொக்கையா தான் இருக்கு!

சென்னையில் நடந்த, உழைப்பாளர் தினம் படத்தின் இசை வெளியீட்டு விழாவில் மா.கம்யூ., முன்னாள் மாநில செயலர் ராமகிருஷ்ணன் பங்கேற்றார்.அப்போது அவர் பேசுகையில், 'மறைந்த இயக்குனர் கே.பாலச்சந்தரிடம், எம்.ஜி.ஆர்., மற்றும் சிவாஜி பார்முலாவில் நீங்கள் பயணிக்கவில்லை. அப்படி இருந்தும் வெற்றி பெற்றது எப்படி?' என கேட்டேன்.'இதற்கு அவர், நான் சினிமாவுக்கு வந்த போது, இப்ப மாதிரி ஹாலிவுட் படங்களை பார்க்கும் வசதி இல்லை. இப்போது, 10 ஹாலிவுட் படங்களை பார்த்து, அதில் இருந்து ஒரு கதையை தயாரிக்கின்றனர். அதனால், எம்.ஜி.ஆர்., சிவாஜி இருவரிடமும் போகாமல், தனிப்பாதையில் பயணிக்க முடிவு செய்தேன். அப்படி இருந்தும் எம்.ஜி.ஆர்., படம் பண்ணலாம் என்று என்னிடம் பலமுறை கேட்டிருக்கிறார்' என்றார்.பார்வையாளர் ஒருவர், 'இப்ப வர்ற படங்களில் சொல்ற அளவுக்கு எந்த கதையும் இல்லையே... எல்லாம் படு மொக்கையா தான் இருக்கு...' என, 'கமென்ட்' அடிக்க, மற்றவர்கள் அதை ஆமோதித்தனர்.